DÍLI, 12 Agostu 2025 – Governu Timor-Leste, liuhosi Ministériu Juventude, Desportu, Arte no Kultura (MJDAK), organiza ho susesu Marsa Saudável hodi komemora Loron Internasionál Juventude. Atividade ne'e hala’o ho tema sentrál: “Aksaun Juventude Lokál ba Atinjimentu Objetivu Dezenvolvimentu Sustentável iha Timor-Leste”.

Marsa ne’e hahú husi edifísiu Ministériu Negósiu Estranjeiru no Kooperasaun (MNEC) nia oin no remata iha resintu MJDAK nian.

Partisipasaun Boot hodi Promove Saúde no ODS

Marsa ne’e hetan partisipasaun masivu no entuziastiku husi: Diretór no funsionáriu MJDAK nian; Joven sira no estudante;  Organizasaun parseira internasionál sira hanesan UNICEF, World Vision, UNFPA, ChildFund, no Plan International.

Partisipante sira hatudu kompromisu boot ba vida saudável no atinjimentu ba Objetivu Dezenvolvimentu Sustentável (ODS).

Atividade ne’e la’ós de’it atu komemora loron importante ida-ne’e, maibé hanesan plataforma atu haki’ik konsiénsia kona-ba papél lideransa juventude sira nian iha sosiedade. Marsa ne’e reforsa mensajen katak asaun lokál husi joven sira bele kontribui diretamente ba objetivu dezenvolvimentu nasionál no globál.

Marsa Saudável ne’e ensera ho lema forte: “Juventude forte, Timor-Leste forte”.

#MídiaMJDAK