DILI, 29 Jullu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha enkontru kordenasaun interministeriál importante ida ne'ebé organiza husi Gabinete Ministru Koordenadór Asuntu Sosiál (MCAS).

Enkontru ne'e involve Ministru sira seluk iha área sosiál, hanesan Ministériu Edukasaun, Saúde, Kombatente da Libertasaun Nasionál, Ensino Superior, Siénsia no Kultura, no Solidariedade Sosiál.

Diskusaun ne'e foka liu ba pontu prinsipál sira-ne'ebé importante ba dezenvolvimentu kapitál sosiál nasionál:

Prioridade Governu iha Asuntu Sosiál

1. Progresu Servisu no Dezafiu: Diskute progresu serbisu no identifika dezafius iha implementasaun planu nasionál no programa interministeriál sira.
2. Preparasaun ASEAN: Dezenvolvimentu Kapitál Sosiál nu'udar parte importante hodi prepara Timor-Leste ba adezaun ASEAN. Ministru sira realsa katak importante tebes atu garante katak kualidade iha área sosiál (hanesan ospitál no ensino superior) bele adapta aan no kompete ho nasaun membru ASEAN seluk.
3. Resposta ba Komunidade: Fó atensaun ba preokupasaun husi Parlamentu Nasionál no Komunidade kona-ba problema sosiál sira. Governu komprometidu atu fó resposta la'ós de'it ho liafuan, maibé ho asaun konkreta ne'ebé orienta ba solusaun.

Partisipasaun Ministru Nelyo Isaac Sarmento nian hatudu kompromisu forte husi MJDAK atu integra dezenvolvimentu juventude, desportu, arte no kultura iha estratéjia dezenvolvimentu sosiál no integrasaun rejionál Timor-Leste nian.

MJDAK apela: Mai ita hamutuk apoia esforsu Governu nian ba futuru di'ak liu ba kapitál sosiál Timor-Leste nian!

#MídiaMJDAK