DILI, 30 JUNU 2026 (GCI-MJDAK) – Vise-Primeiru-Ministru no Ministru Koordenador Asuntu Sosiál, Eng. Mariano "Assanami" Sabino, lidera reuniaun koordenasaun ho membru Governu sira ne'ebé responsável ba área sosiál, iha Salaun Ministériu Saúde, Caicoli, Dili, loron 30 Junu 2026. Reuniaun ne'e hala'o ho objetivu atu garante efetividade, sinergia, no koordenasaun di'ak entre instituisaun sira iha implementasaun programa no atividade sosiál.

Partisipasaun iha reuniaun ne'e involve S.E. Ministru Juventude, Desportu, Arte no Kultura (MJDAK), Nelyo Isaac Sarmento, ne'ebé akompaña husi Diretor Jeral Servisu Korporativu, João dos Santos. Enkontru ne'e mós partisipa husi Ministra Solidariedade Sosiál no Inkluzaun, Ministru Asuntu Combatente Libertasaun Nasionál, Ministra Saúde, Ministru Ensinu Superior, Siénsia no Kultura, Ministra Edukasaun, Sekretariu Estadu Arte no Kultura, no Diretores Jeral sira husi kada ministériu.

Iha nia intervenasaun, Vise-Primeiru-Ministru Assanami subliña katak reuniaun ne'e mak dala segundu ne'ebé hala'o iha tinan ida ne'e, ho kompromisu atu halo reuniaun regulár kada fulan tolu hodi fó dalan ba koordenasaun efetivu. Nia hateten katak Primeiru-Ministru orienta atu programa planu sira tenke fó impaktu boot ba povu, liuliu iha área nutrisaun no ai-han di'ak ba labarik sira, tanba dadus hatudu katak estatístika a'as tebes. Vise-PM Assanami mós husu ba Diretores Jeral sira no ekipa tékniku atu halo lalais elabora planu ho didiak, ho foku ba objetivu prinsipál iha área edukasaun, saúde, no sosial, no enfatiza katak dadus ne'ebé loos no atualizadu mak importante tebes hodi suporta desizaun polítika ne'ebé efetivu.

Iha okaziaun ne'e, Ministru Nelyo Isaac Sarmento hateten katak asuntu juventude nu'udar asuntu transversál ne'ebé liga ba instituisaun governu sira hotu no presija koordenasaun intersetoriál. Nia dehan katak polítika nasional ba juventude iha pilar ne'ebé presija atensaun atu ajuda jerasaun tuir mai, no koordenasaun ho ministériu sira iha área edukasaun no saúde importante tebes atu jerasaun foun sira bele hanoin nafatin identidade Timoroan. Ministru Nelyo mós hatutan katak investimentu estratéjiku importante atu garante katak iha tinan 10 ka 20 mai ne'e, jerasaun foun sira iha ona kapasidade no responsabilidade ba nasaun.

Reuniaun koordenasaun no supervizaun ne'e mós marka ho kompromisu forte husi membru Governu sira atu hamutuk garante katak polítika sosiál ne'ebé implementa bele responde ho efetividade ba nesesidade povo, ho vizualizasaun klaru ba dezenvolvimentu nasional ne'ebé inkluzivu no sustentável.