DILI, 6 MARSU 2026 – Ministru Juventude, Desportu, Arte no Kultura (MJDAK), S.E. Nelyo Isaac Sarmento, ohin sesta-feira, partisipa iha Sorumutu Estraordináriu Konsellu Ministrus (KM) ne’ebé hala’o iha Auditóriu Kay Rala Xanana Gusmão, Ministériu Finansas, Ai-tarak Laran, Dili.

Sorumutu ne’ebé prezide husi Primeiru-Ministru ne’e foka liu ba analiza estratéjika hodi garante kontinuidade ba Projetu Tasi Mane, liuliu ba kbiit South Coast Supply Base (SSB) no Autoestrada Zumalai–Natarbora. Governu foti desizaun ne'e hodi evita atrazus iha ezekusaun projetu sira ne’ebé konsidera vitál ba ekonomia nasionál.

Iha sorumutu ne’e, Konsellu Ministrus delibera hodi foti nota ba informasaun ne’ebé aprezenta husi Ministru Petróleu no Rekursus Minerais (MPRM) kona-ba konteúdu karta husi Embaixada Repúblika Populár Xina nian. Karta ne’e relasiona ho empreza xineza ne’ebé hetan klasifikasaun di’ak liu ba Lote 2 iha prosedimentu konkursu nian.

Hodi asegura konkluzaun projetu nian, Governu deside hodi autoriza Komisaun Nasionál Aprovisionamentu (CNA) atu hahú lalais negosiasaun ho empreza refere. Alende ne’e, Governu sei kontinua akompaña no monitoriza prosedimentus regulatórius husi parte Xina nian, nune’e transferénsia fundus no ezekusaun projetu iha rai-li’ur bele la’o tuir planu.

Prezensa Ministru MJDAK iha sorumutu ne’e hatudu koperasaun solidu entre membru Governu da-IX nian hodi fó apoiu ba dezenvolvimentu infraestrutura boot ne’ebé sei fó impaktu mós ba oportunidade servisu ba foin-sa’e sira iha futuru.

#MídiaMJDAK