DILI, 28 Jullu 2025 – Hafoin semana ida ne'ebé nakonu ho emosaun, kompetisaun, no ksolok iha XII Jogos Desportivos CPLP 2025 no XVI Konferénsia Ministru Juventude no Desportu CPLP, agora to'o ona tempu ba delegasaun hotu atu fila hikas ba sira-nia rai.

Ministru sira Juventude no Desportu husi nasaun membru CPLP nian, hamutuk ho atleta sira no ekipa téknika sira hotu, hahú ona sira-nia viajen husi Dili, Timor-Leste. Sira lori hamutuk esperiénsia ineskeseível, amizade foun, no espíritu unidade ne'ebé harii durante eventu istóriku ne'e.

Timor-Leste Agradese Partisipasaun Másima

Timor-Leste, liuhosi Ministériu Juventude, Desportu, Arte no Kultura (MJDAK), sente orgullu tebes tanba bele sai uma-na'in ba enkontru signifikativu ida-ne'e.

MJDAK hato'o agradesimentu hosi laran ba partisipasaun másima no kontribuisaun husi nasaun-maun-alin Komunidade País ho Lian Portugés (CPLP) nian ne'ebé halo eventu ne'e susesu boot.

Esperansa husi Governu Timor-Leste nian mak katak ligasaun forte ne'ebé kria iha Dili sei nafatin metin no kontinua hadai valór sira CPLP nian ba fraternidade, dame, no kooperasaun.

#MídiaMJDAK