MANUFAHI, 24 Abríl 2026 (GCI/SEAK) – Governu liuhusi Sekretaria Estadu Arte no Kultura (SEAK), reprezenta husi Diretór Nasionál Promosaun Arte (DNPA), Felix Ximenes, hamutuk ho Administradór Postu Administrativu (APA) Fatuberliu, Marcelo Amaral, inagura Uma Lisan "Maka'er Lulik" ne’ebé lokaliza iha Aldeia Weberek, Suku Clacuc, Munisípiu Manufahi, sesta-feira ne’e.

Objetivu husi inagurasaun ne’e mak hodi motiva no fó kbiit ba lia-na’in sira atu kontinua transmite rituál no istória orál ba jerasaun foun, liuliu kona-ba tradisaun hatama sasán lulik ba uma lisan laran tuir lala'ok kultura Timor-Leste nian.

Transmisaun Kultura ba Jerasaun Foun

Iha ninia diskursu, Diretór Nasionál Felix Ximenes hato’o parabéns ba komisaun organizadora no família boot uma lisan nian ne’ebé konsege halibur hamutuk fetosan no umane hodi hari’i hikas sira-nia knua.

"Lori Ministériu Juventude, Desportu, Arte no Kultura, liuhusi Sekretáriu Estadu Arte no Kultura nia naran, ha’u hato’o parabéns ba avó no lia-na’in sira. Inagurasaun ne’e importante tebes hodi asegura katak rituál no istória orál sira ne’ebé ita iha la lakon, maibé jerasaun foun sira bele hatene no kaer metin nafatin," dehan Felix Ximenes.

Polítika ba Prezersavasaun Patrimóniu

Felix Ximenes mós esplika katak SEAK iha polítika ne’ebé klaru hodi prezerva no konserva patrimóniu identidade kulturál, tantu materiál hanesan uma lisan, nune’e mós imateriál hanesan dalen, tais, no istória orál sira. SEAK sei kontinua serbisu maka’as hodi promove eransa hirak ne’e nu’udar identidade úniku ne’ebé Timor-Leste iha iha mundu nia oin.

Iha biban ne’e, reprezentante SEAK ne’e mós hato’o ninia apresiasaun tanba jerasaun foun husi uma lisan Maka'er Lulik hatudu entuziazmu boot hodi uza uniforme tais tradisionál. Jestu ne’e konsidera nu’udar istória boot ida ne’ebé hatudu katak foin-sa’e sira mós iha responsabilidade hodi promove kbiit tais nian.

Inagurasaun ne’e hetan partisipasaun husi APA Fatuberliu, autoridade lokál husi Suku no Aldeia, forsa seguransa, no família boot husi jerasaun foun uma lisan Maka'er Lulik nian.