DILI, 28 Jullu 2025 – Iha loron Segunda-feira ne'e, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa ativamente iha Sorumutu Estraordináriu importante ida. Reuniaun ne'e lidera husi Sua Exelénsia Primeiru-Ministru, Kay Rala Xanana Gusmão, ne'ebé foka ba preparasaun finál Timor-Leste nian atu tama nu'udar membru plenu ba Asosiasaun Nasaun Sudeste Aziátiku (ASEAN).

Urjénsia ba Integrasaun Ofisiál

Primeiru-Ministru Xanana Gusmão husu urjénsia ba Ministériu hotu, inklui MJDAK, atu finaliza lalais dokumentu no rekizitu legál sira. Rejime Governu nian hatudu katak iha fulan-Outubru tinan ne'e, Timor-Leste atu ofisialmente integra ba ASEAN iha Simeira ASEAN ba dala-47, ne'ebé sei hala'o iha Malázia.

Ministru Nelyo Isaac Sarmento nia prezensa hatudu kompromisu Governu nian, liuhosi MJDAK, atu kontribui ba aspetu hotu-hotu husi adezaun istóriku ida-ne'e.

MJDAK Garante Perspetiva Juventude no Desportu

Prezensa MJDAK nian asegura katak perspetiva kona-ba dezenvolvimentu juventude, desportu, arte, no kultura mós integra iha prosesu boot nasionál ida-ne'e. Nu'udar membru ASEAN, Timor-Leste sei hetan oportunidade hodi hametin koperasaun, interkámbiu talentu, no partisipa iha eventu rejionál sira ne'ebé liga ho MJDAK nia mandatu.

Governu Konstitusionál IX apela ba sidadaun Timoroan hotu atu hamutuk apoia prosesu istóriku ida-ne'e, ne'ebé sei define futuru Timor-Leste nian iha rejiaun.

#MídiaMJDAK