DÍLI, 12 MARSU 2026 – Ministériu Juventude, Desportu, Arte no Kultura (MJDAK), liuhusi Gabinete Inspesaun no Auditoria (GIA), organiza workshop lala’ok ezekusaun orsamentu ba tinan fiskál 2026.

Objetivu husi atividade ne’e mak atu fó kbiit no komprensaun ba kargu xéfia no funsionáriu sira kona-ba mudansa no regra sira ne’ebé hakerek iha Dekretu-Lei Nu. 41/2025 (Ezekusaun OJE 2026), hamutuk ho regulamentu suporta sira seluk hanesan DL Nu. 39/2024, DL Nu. 1/2025, no DL Nu. 3/2026 ne'ebé foka ba kestaun kontratu no kualidade despeza Estadu nian.

Diretora-Jerál Servisu Korporativu (DJSK), Isabel Adalziza Fátima Rodrigues Ferreira, iha nia diskursu abertura subliña katak integritade iha serbisu tenke sai prioritade. "Ita-nia governasaun tenke moos. Diseminasaun ba DL sira-ne'e importante tebes hodi asegura katak implementasaun atividade hotu la'o tuir dalan legál no labele ses husi regra sira ne'ebé Estadu estabelese ona," dehan Isabel Adalziza iha Salaun Uma Ne’he Biti Boot, Lecidere.

Iha fatin hanesan, Koordenadór Asesor Jurídiku Ministériu Finansas, Isac Menezes, lori kbiit nu'udar fasilitadór hodi esplika detallu tékniku husi regulamentu sira ne'e. Nia hateten katak maske iha mudansa balu, maibé kompeténsia dirijente sira nian atu ezekuta reseitas no despezas nafatin bazeia ba prinsipál transparénsia nian.

Aleinde ne'e, Inspetór GIA, João dos Santos, mós hametin nafatin katak kualidade serbisu no inisiativa atu buka-hatene regra foun sira mak sei proteje instituisaun husi fallansu administrativu iha futuru.

Atividade ne'e partisipa ho másimu husi Diretór Nasionál sira, Kargu Xéfia husi MJDAK no Sekretaria Estadu Arte no Kultura (SEAK), Prezidente Konsellu Reguladór Artes Marsiais (KRAM), no funsionáriu relevante sira.

#MídiaMJDAK