DILI, 12 Augustu 2026, GKI—Xefi Gabinete (XG) Ministériu Juventude, Desportu, Arte no Kultura (MJDAK), Egas Barros Guterres Godinho, reprezenta Ministru MJDAK taka (ensera) atividades Komemorasaun Loron Internasional Juventude (LIJ) iha resintu MJDAK.  Egas taka atividade marsa saudavel ne’ebe hahu husi Palasiu Presidenti Aitarak-laran no ramata iha resintu MJDAK nudar finalidade husi atividades hotu ne’ebe hahu husi 10-12 Agostu 2026.   

Egas Barros Guteres Godinho agradese ba iha parseiru dezenvolvimentu hamutuk ho juventude sira nia apoiu ba selebrasaun loron internasionál juventude hanesan loron importante ida ne’ebé juventude sira bele aprende liu husi formasaun sira hodi prepara an ba futuru.

“Agradese tebes ba iha parseiru dezenvolvimentu hanesan UNICEF no UNFPA nia apoiu ba atividade importante selebrasaun loron Internasionál Juventude nian. Itaboot sira bele aprende buat ruma durante loron formasaun sai esperiénsia ida ba imi ho nia tema Juventude ohin Loron Oportunidade no Dezafius iha Futuru katak itaboot sira nafatin hasoru dezafius no oportunidade sira hodi buka aprende no dezenvolve itaboot sira nia aan ba futuru,” Egas esperansa. 

Enkuantu selebrasaun loron internasionál ba tinan ida ne’e MJDAK Servisu hamutuk parseiru dezenvolvimentu sira hanesan UNICEF, UNFPA, Sentru Juventude CCYC, hamutuk ho Universidade no Ensinu Sekundáriu iha Dili, hodi  realiza atividades semináriu durante loron rua inklui mós atividade marsa saudavél. Partisipa iha atividade ne’e mai husi MJDAK, hamutuk ho parseiru dezenvolvimentu sira UNICEF, UNFPA, CCYC, no mós universidade sira hanesan, UNTL, IOB, inklui estudante Ensinu Sekundáriu sira. #MédiaMjdak#