DÍLI, 16 JUÑU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, ohin loron simu vizita Kortezia husi Enkarregadu Embaixada Áustria ba Timor-Leste ne'ebé bazeia iha Jakarta, Sr. Michael Wislocky, iha Salaun Magna MJDAK, Lecidere, Dili.

Sorumutu ne'e diskute ho objetivu atu hametin kooperasaun bilaterál entre Timor-Leste no Áustria iha área sira tuir mai: dezenvolvimentu juventude, kapasitasaun talentu desportivu, interkámbiu arte no kultura, apoiu ba programa Hackathon UNICEF, no formasaun profisionál ba joven sira.

Iha okaziaun ne'e, Ministru Nelyo Isaac Sarmento aprezenta projetu estratéjiku MJDAK sira hanesan Biblioteka Nasionál, Akademia Kultura, no Muzeu Nasionál ne'ebé dadaun sei harii. Projetu sira-ne'e ho objetivu atu hadi'a infraestrutura kulturál no edukativu ba juventude no sosiedade Timor-Leste nian.

Enkarregadu Áustria, Sr. Michael Wislocky, fó apoiu forte ba adezaun Timor-Leste nian ba ASEAN no oferese kooperasaun iha área formasaun profisionál, liuliu iha setór juventude no kultura. Áustria manifesta interese atu fahe esperiénsia no kapasitasaun tekniku hodi suporta dezenvolvimentu kapitál umanu iha Timor-Leste.

Sorumutu ne'e marka pasu importante iha relasaun diplomátika no kooperasaun entre Timor-Leste no Áustria, ho foku ba dezenvolvimentu joven sira nu'udar futuru nasaun no hametin interkámbiu kulturál entre nasaun rua.

#MediaMjdak