DÍLI, 18 JUÑU 2026 – Sua Exelénsia Ministru Juventude, Desportu, Arte no Kultura (MJDAK), Sr. Nelyo Isaac Sarmento, simu vizita kortezia husi delegasaun altu-nível Komité Olímpiku Ázia (OCA) no Komité Organizadór Jogos Asiátiku Aichi-Nagoya (AINAGOC), hamutuk ho Comité Olímpiku Nasionál Timor-Leste (CONTL), iha Salaun Magna MJDAK, Lecidere, Dili.

Vizita ne'e hala'o ho objetivu atu hametin kooperasaun no diskute preparasaun ba partisipasaun atleta Timor-Leste iha Asian Games 2026 ne'ebé sei realiza iha Aichi-Nagoya, Japaun.

Sorumutu ne'e foka liu ba kestaun estratéjiku sira hanesan:

Parseria Sólidu: Hametin kooperasaun hodi fasilita no apoia partisipasaun atleta Timor-Leste iha Asian Games iha Japaun, liuliu iha área logístika, treinamentu, no preparasaun atleta.

Aliñamentu ba preparasaun ba eventu "Fun Run" hanesan plataforma promosaun ba Jogu Asiátiku 2026 nian, hodi envolve komunidade no promove desportu iha Timor-Leste.

Diskusaun ba oportunidade kolaborasaun foun atu hasa'e kapasidade no inisiativa desportu iha rai laran, inklui programa kapasitasaun ba ofisial desportu no treinadór sira.

Prezente iha sorumutu ne'e Adjunta Diretora AINAGOC, Sra. Manami Okumura, Diretór OCA, Sr. Wissam Trisman, no ofisial AINAGOC, Sra. Shiho Murakami. Sira mós aprezenta detallu kona-ba sede kompetisaun, fasilidade, no apoiu ne'ebé sei fó ba atleta partisipante sira.

Ministru Nelyo Isaac Sarmento hato'o agradesimentu ba OCA no AINAGOC tanba vizita no apoiu ne'ebé fó ba Timor-Leste. Nia reafirma kompromisu Governu nian atu prepara atleta sira ho di'ak no asegura partisipasaun maksimu iha Asian Games 2026.

Sorumutu ne'e marka pasu importante iha preparasaun Timor-Leste ba eventu desportivu boot iha nível kontinente, no hametin pozisaun Timor-Leste iha komunidade desportiva rejionál.

#MediaMjdak