DILI, 15 Jullu 2025 — Ministériu Juventude, Desportu, Arte no Kultura (MJDAK), liuhosi DiresaunNasionál Patrimóniu Lojístika no Infraestrutura (DNPLI), Xefe Departementu Rafael Cristian Exposto nudar mos diretor interino DNPLI, hamutuk ho Diretór Nasionál Planeamentu Monitorizasaun no Kooperasaun (DNPC), Ananias Bendito da Silva Pinto, diskute ona proposta ba konstrusaun salaun desportiva multifunsaun no kampu futeból iha munisípiu sira. Reuniaun ne'e hala'o iha Salaun Magna MJDAK, Lecidere, Dili.

Dezenvolvimentu Infraestrutura hodi Hadi'a Prestasaun Atleta sira

Ministru Nelyo Isaac Sarmento hatete katak objetivu husi enkontru ne'e maka atu harii fasilidade desportiva sira hodi fasilita eventu no hadi'a prestasaun atleta sira-nian.

"Ami diskute proposta atu harii salaun multifunsaun no kampu futeból iha munisípiu no postu sira. Objetivu mak atu atleta sira bele uza fasilidade hirak ne'e atu halo treinamentu, hodi hadi'a sira-nia prestasaun," dehan Ministru Sarmento. "Ida ne'e importante tebes atu kria uluk kondisaun iha munisípiu sira."

Projetu ba Salaun no Kampu Futeból

Tuir rezultadu diskusaun, ekipa sei harii Salaun Desportiva Multifunsaun iha munisípiu haat, hanesan Liquiçá, Covalima, Lautém, no Manatuto. Nune'e mós, sei harii kampu futeból iha munisípiu rua, hanesan Manufahi no Aileu.

Diskusaun ne'e partisipa mós husi Xefe Departamentu Dezenvolvimentu Infraestrutura, Nelson Smith Lay, Xefe Seksaun Lojístika no Manutensaun, Geraldo Moniz Bareto, no Xefe Departamentu Planeamentu no Kooperasaun, Jacinto António Ximenes, hamutuk ho enjineiru no ekipa téknika sira.

#MídiaMJDAK