DILI, 24 Jullu 2025 – Momentu istóriku ida akontese iha XII Jogos Desportivos da Komunidade ba País Lian Portugés (CPLP) 2025. Ohin, iha Estadiu Munisipál Dili, hetan prezensa boot husi Sua Exelénsia Primeiru-Ministru, Kay Rala Xanana Gusmão, ne'ebé mai asiste diretamente jogu futebol entre nassaun membru CPLP, Portugál no Kabuverde.

Prezensa Xefe Governu nian ne'e akompaña husi Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento.

Vizita husi Primeiru-Ministru ne'e hatudu duni kompromisu boot lideransa Timor-Leste nian ba dezenvolvimentu desportu no apoiu másimu ba eventu internasionál importante ida ne'e.

Jogu entre Portugál no Kabuverde promete intensa no nakonu ho emosaun, hodi fó oportunidade ba partisipante sira atu selebra espíritu desportivu no amizade CPLP nian.

Komisaun Organizadora no MJDAK agradese ba S.E. Primeiru-Ministru nia prezensa, ne'ebé fó motivasaun boot ba atleta hotu no garante susesu ba jogu sira CPLP nian.

#MídiaMJDAK