Bobonaro, 25 Juñu 2026 – S.E. Ministru Juventude, Desportu, Arte no Kultura (MJDAK), Nelyo Isaac Sarmento, hato'o agradesimentu ba Kompania Aka-Lestarindo LDA ne'ebé konklui ona konstrusaun kampu mini soccer futebol ho padraun internasional iha Batugade, Postu Balibo, Munisipiu Bobonaro.

"Planu ne'e ami halo kleur tiha ona," dehan Ministru Nelyo, ne'ebé mós sublina katak iniciativa ida ne'e hahu husi nia tempu nu'udar Sekretariu Estadu Juventude Desportu (SEJD) bainhira husu ba kompania Aka-Lestarindo atu kontribui ba dezenvolvimentu desportu iha rai.

Ministru Nelyo hateten: "Se imi iha hanoin atu ajuda ita nia rai liu husi buat ne'ebé imi bele oferese ba ita nia povo no liuliu ba ita nia joven sira, entaun ita fo ideias balun."

S.E. MJDAK mós enfatiza katak projetu ida ne'e hanesan ezemplu ba investidor lokal sira atu hatudu katak: "Rai ne'e ita nian, laós ema seluk nian. Ita kolabora entre instituisaun estadu nian ho sentru privadu hodi servisu hamutuk atu halo netik buat ruma ba ita nia rai."

Sr. Miguel Lucas, Diretor Aka-Lestarindo LDA, dehan: "Du'ut ne'ebé ami kuda ne'e mai husi rai liur no kahur mos ho ita nian lokal balun. Ida ne'e hanesan projetu pilotu, no ami hakarak mos investe iha munisipiu sira seluk hodi fasilita ita nia joven sira atu hatudu sira nia talentu diak."

Partisipa mós iha okaziaun ida ne'e: Prezidente Autoridade Munisipiu Bobonaro (PAMB), Sr. Paulo Monis Maia; Autoridade Postu Balibo; Xefe Suku sira; Komandante PNTL; Diretor Nasional Patrimóniu, Lojístika no Infraestrutura MJDAK nian hamutuk ho ekipa tékniku sira.

Kampu mini soccer ida ne'e ho padraun internasional ne'ebé konklui ona, espera atu sai fatin ba dezenvolvimentu futebol iha munisipiu Bobonaro no mós fatin atu hatudu talentu joven sira iha área desportu.

Iniciativa ida ne'e mós hatudu kolaborasaun di'ak entre setór públiku no privadu iha esforsu hamutuk atu dezenvolve infraestrutura desportiva iha Timor-Leste.

*Mai ita hamutuk dezenvolve ita nia rai. *

#MediaMjdak