ERMERA, 18 JUÑU 2026 – Ministériu Juventude, Desportu, Arte no Kultura (MJDAK), ne'ebé reprezenta husi Diretor Jerál Desportu, David Tomás de Deus, enserra ofisialmente 3º Divizaun Liga Voleibola Timor-Leste nian iha Munisípiu Ermera. F-FDTL Destakadu Ermera manan klubu prizaun ho skore 25 a 13 iha final ne'ebé hala'o durante fulan ida tomak.

Iha ninia diskursu, Diretor Jerál Desportu, David Tomás de Deus, fó apresiasaun boot ba treinador sira husi klubu hotu-hotu, presidente klubu nian, no árbitru sira ne'ebé esforsu teb-tebes hodi asegura katak jogu ne'e lao ho di'ak. Nia subliña katak árbitru sira importante tebes tanba jogu ne'e nia problema boot iha árbitru sira.

"Objetivu husi MJDAK CUP 2026 ida ne'e mak atu dezenvolve talentu ne'ebé iha, partikularmente ba área voleibola nian. Liu husi prosesu ida ne'e, ita hakarak jogu ne'e hahu husi nivel baze to'o mai nivel nasionál. Tinan ida ne'e ita halo iha kada munisípiu liu husi liga 3º Divizaun, no ikus mai bele hetan atleta sira ne'ebé seleciona," dehan David Tomás de Deus.

Nia mós hatete katak agora dadaun, Ermera de'it mak hasoru malu, maibé ba futuru sira sei ba kompete iha Dili no hasoru ho munisípiu sira seluk iha 2º Divizaun. Tanba ne'e, nia enkoraja atleta sira atu treinu makas liután.

"Presidente asosiasaun ho ekipa sira hotu, ita boot sira buka atu aprende diak liután atu bele kompete ho munisípiu sira seluk. Ha'u hakarak husu ba treinador no árbitru sira katak tenke reforsa diak liután iha área sira-ne'e, hodi evita dezentendimentu ruma iha jogu laran," nia hatete.

David Tomás de Deus mós informa katak agora dadaun iha ámbitu desentralizasaun, parte Ministériu sei delega asuntu lubuk ida ba munisípiu sira. "Asosiasaun voleibola munisípiu bele koloka ona orsamentu balun ba desportu ne'e. Jogu sira bainhira la'o iha munisípiu, munisípiu mak tau matan; no bainhira ba nasionál, responsavel husi nasionál nian," nia esplika.

Nia mós informa katak jogu sira sei tuir mai nafatin, no sei realiza Festival Nasionál Desportu (FND) iha Dili. "Ohin halo ona seleksaun ne'e, sei ba tuir 2º Divizaun iha Dili, no prepara fila fali atu tuir FND iha Dili," dehan nia.

FND sei lori modalidade lubuk ida, hanesan futebol, voleibola, basketbola, boxe, atletizmu, taekwondo, karate-do, desportu tradisional hana kalik, no sira seluk tan.

MJDAK mós tau ona planu atu realiza Festival Juvenil iha kada munisípiu ho idade 10 to'o 16 anos. "Sujere ba presidente asosiasaun sira no klubu sira atu prepara an atu hahu dezenvolve ita nia atleta sira," hatete David Tomás de Deus.

MJDAK CUP 2026 iha ámbitu 3º Divizaun Liga Voleibola Timor-Leste ne'e mós servisu hamutuk ho Federasaun Voleibola Timor-Leste (FVTL) hodi realiza atividade ida-ne'e.

Entidade sira ne'ebé partisipa ba eventu ne'e mak mai husi reprezentante PAM Ermera, Presidente CCI-TL Ermera, Reprezentante Presidente FVTL, Diretor PNDS Munisipal, Komandu F-FDTL Destakadu Ermera, no komunidade sira hotu.

#MediaMjdak