DILI, 22 JANEIRU 2026 – Ministru Juventude, Desportu, Arte no Kultura (MJDAK), Nelyo Isaac Sarmento, simu vizita husi estrutura foun Konfederasaun Desportu Timor-Leste (CDTL) ba tinan 2025-2029. Enkontru ne’e hala’o iha Salaun Magna MJDAK, Dili, iha loron-kinta ne’e.

Iha biban ne’e, Ministru Nelyo hato’o parabéns ba estrutura foun ne’ebé foin simu pose. Governu husu ba Prezidente CDTL ho nia ekipa tomak atu servisu ho laran-moos, profisionál, no independente durante mandatu tinan haat oin mai.

“Ita espera CDTL bele harii ligasaun di’ak ho federasaun sira hodi dudu desportu iha rai-laran. CDTL mós tenke kria liña koordenasaun ne’ebé metin ho Governu. Ita tenke servisu hamutuk hodi foti sa’e desportu ba prestasaun,” dehan Ministru Nelyo Isaac Sarmento.

Ministru mós hateten katak desportu la’ós de’it kona-ba manán ka lakon iha kompetisaun. Desportu mak dalan ida hodi hametin amizade no unidade entre Timor-oan sira hotu.

Enkontru ne’e hetan partisipasaun husi Prezidente CDTL, membru estrutura foun, no asesór sira husi Ministériu nian.

#MídiaMJDAK