DILI, 15 Outubru 2025 – Ministériu Juventude, Desportu, Arte no Kultura (MJDAK), liuhosi Gabinete Komunikasaun no Informasaun (GCI), ensera ofisiálmente atividade estájiu ba formandu na'in-rua (2) husi Diresaun Nasionál Formasaun Téknika no Komunikasaun (DNFTC) SECOMS, Sra. Justina Freitas Soares  no Sra.Zemilia da Costa Clau, iha área Unidade Hakerek ba Televizaun. Estájia ne'e hala'o durante fulan ida (1).

Serimónia enseramentu iha Sala Ema ho Defisiénsia (EhD) MJDAK, Lecidere, Dili ne'e hetan partisipasaun husi Koordenadóra GCI, Sra. Aida de Jesus Soares, Diretór Jerál Juventude (DJJ), Sr. David Tomas de Deus no Xefe Departamentu Informasaun no Públikasaun (DIP), Sr. Domingos C. Mendonca.

Objetivu MJDAK: Hadi'a Profesionalizmu

Koordenadóra GCI, Sra. Aida de Jesus Soares, hatete katak estájiu ne'e hanesan parte esensiál ida atu kapasita no fortifika estajiadu sira-nia kuñesimentu iha área ne'ebé sira aprende ona:

"Estájiu ne’e hanesan parte ida atu hadi’a liután ita boot sira-nia kuñesimentu iha área ne'ebé ita boot sira durante aprende, liuliu iha komunikasaun nian, hodi bele partilla informasaun ba públiku ho loloos no faktus dadus ne'ebé kredível hodi hadi'a ita boot sira-nia profisionalidade," Sra. Aida de Jesus hateten.

Nia agradese ba estajiadu na'in-rua nia dedikasaun durante períodu estájiu hodi aprende hamutuk ho ekipa GCI.

Produsaun Mídia nu'udar Rezultadu Klaru

Husi parte estajiadu, Sra. Justina Freitas no Sra. Zemilia Clau, hato'o agradesimentu wa'in ba MJDAK liuliu GCI no ekipa tomak nia tulun. Maski tempu badak, sira rekoñese katak estájiu ne'e sai nu'udar buka’e importante ida ba sira-nia futuru.

Durante fulan ida ne'e, estajiadu sira hamutuk ho ekipa GCI konsege produz rezultadu tanjível: Produsaun vídeo dokumentáriu kona-ba Formasaun Relasaun Saudavél no Produsaun vídeo profile kona-ba Sentru Juventude Comoro (CCYC).

Produsaun hirak ne'e fó kontribuisaun boot ba MJDAK hodi bele públika iha pajina ofisiál Facebook, nune'e bele fahe informasaun kredível ba públiku.

MJDAK kontinua komprometidu atu sai fatin ba joven sira hodi dezenvolve sira-nia abilidade prátiku.

#MídiaMJDAK