DILI, 17 Jullu 2025 – Hafoin iha kompromisu naruk no espiritu reziliénsia ne’ebé maka’as, Timor-Leste prontu atu akolla XII Jogos Desportivos da Comunidade dos Países de Língua Portuguesa (CPLP) iha Dili, hahú hosi loron 17 to’o 27 Jullu 2025. Eventu internasionál ida-ne'e la’ós de’it selebrasaun desportiva, maibé mós prova ida husi progresu no esperansa ne’ebé rai ne’e hatudu ona.

Jornada Ida Ne'ebé Hahú Husi Tinan 2018

Kompromisu Timor-Leste nian ba Jogos CPLP ne’e la’ós foin agora. Iha tinan 2018, ho orgullu, ami-nia nasaun simu ona mandatu atu organiza jogu sira-ne'e. Maski iha dezafiu barak, Timor-Leste hatudu ona ninia espiritu ospitalidade no prontidaun atu akolla atleta no partisipante sira hosi nasaun CPLP seluk.

Planu atu akolla jogu sira iha tinan 2020 adia tiha tanba dezafiu globál ne'ebé la bele sees, liuliu pandemia COVID-19. Maibé, ida-ne'e la hamate espiritu no mehi ami-nia povu nian, maibé sai hanesan forsa boot ida hodi kontinua preparasaun ho determinasaun ne’ebé boot.

Agora, Fila Fali Ho Forsa Tomak

Hafoin tinan balun ho preparasaun no esperansa, agora Timor-Leste prontu ho forsa tomak atu realiza eventu istóriku ne'e. Akolla XII Jogos CPLP la'ós de'it hanesan kompromisu ida ba CPLP no dezenvolvimentu desportivu, maibé mós hanesan selebrasaun ba reziliénsia, progresu, no esperansa Timor-Leste nian.

Eventu ida-ne’e sei kria istória ho momentu sira ne'ebé la bele haluha, fó oportunidade ba ita-nia joven sira atu kompetisaun ho atleta sira hosi nasaun seluk, no haburas unidade no amizade entre Estadu-membru CPLP sira.

Timor-Leste prontu ona atu kria momentu ne’ebé sei sai hanesan kapitulu importante ida iha istória desportu no nasionál.

#MídiaMjdak