Dili, 10 Novembru 2025 – Ministériu Juventude, Desportu, Arte no Kultura (MJDAK) ohin ofisialmente Asina Akordu Servisu Hamutuk (ASH) ho grupu juventude na'in-ualu (8) ne'ebé hetan selesaun iha Programa Empoderamentu Juventude Inovativu-Mudansa (PEJI-M) 2025. Serimónia asinatura ne'e hala'o iha Salaun Reuniaun Ema ho Defisiénsia.

Transparénsia Prosesu Selesaun

Tuir Tekniku Administrasaun, Sr. Lourenço Valente Nasri de Carvalho, prosesu selesaun ne'e hahú hosi totál proposta 52 ne'ebé MJDAK simu.

"Proposta 11 mak liu; maibé iha seleksaun finál, ami fó apoiu orsamentu ba grupu juventude na'in-ualu (8) de'it ne'ebé kompleta duni kritériu PEJI-M," tenik Sr. Lourenço Nasri.

Asinatura ASH garante katak grupu na'in-ualu ne'e hatene ona padraun no prosedimentu MJDAK nian nu'udar parseiru foun, hodi garante jestaun ne'ebé responsável.

Apoiu ba Juventude Husi Munisípiu

Grupu na'in-ualu ne'ebé hetan apoiu ne'e mai hosi Munisípiu no Nasionál, hodi reforsa MJDAK nia kompromisu atu hasa'e dezenvolvimentu iha baze: Asosiasaun Enjinaria Petroleu Timor-Leste (Hera-Dili); Asosiasaun Leonel Training Center (Viqueque); Asosiasaun Foin-sa’e ba Dame / Timor-Leste Youth for Peace (Dili); Asosiasaun Irmauns Solidarius (AIS) (Dili); Asosiasaun Tane Juventude (ATJ) (Ermera); Asosiasaun DIA (Ermera Gleno); Lenuk Tasi Rescue and Conservation Center (Liquiçá) no Juventude Dezenvolvimentu Nasional (JDN) (Dili)

Publikasaun Ofisiál ba parseiru na'in-ualu ne'e sei halo iha loron 12 Novembru 2025 iha Munisípiu Aileu, nu'udar parte hosi komemorasaun Loron Nasionál Juventude.

#MídiaMJDAK