COVALIMA, 8 Outubru 2025 – Kampu Futebol Salele, Munisípiu Covalima, sai istóriku ba jogu intensa ida iha ámbitu Fronteira Cup 2025. Ekipa Forte husi Bobonaru hatudu sira-nia forsa maka'as hodi fó dezafiu boot ba ekipa uma-na’in Covalima B, ne'ebé ikus mai manán ho eskor boot 7-0.

Vitória ne'e hatudu duni katak Bobonaru, nu'udar kampiaun Fronteira Cup ba tinan barak, iha poténsia ne'ebé la bele nega.

Manán ho Dezafiu Organizasaun

Kapitaun Ekipa Bobonaru, Pedro Paulo Vicente, espresa ninia kontente ho vitória ne'e. Maibé, Pedro Paulo hatete katak sira-nia preparasaun mínimu tebes hodi tuir kompetisaun ne'e, ne'ebé sai nu'udar dezafiu ida ba sira.

Nia apela ba Komisaun Organizadora no autoridade relevante atu hadi’a kondisaun no preparasaun jogu nian ba ekipa hotu iha futuru, hodi garante katak kualidade kompetisaun desportiva bele kontinua sa'e.

Espíritu Luta Covalima B La Lakon

Maski hetan lakon ho eskor boot, jogadór husi Ekipa Covalima B, Amândio Cardoso de Araújo, mantein espíritu desportivu no mehi atu manán iha jogu tuir mai.

"Aban ami Covalima B mós haka’as an no manán RAEOA ho eskor 3-0, atu nune'e ami bele avansa ba oin!" Amândio Cardoso hateten.

Deklarasaun husi Amândio hatudu duni espíritu desportivu ne'ebé MJDAK hakarak promove: dedikasaun, optimizmu, no kompromisu atu kompete to'o rohan.

MJDAK kontinua fó apoiu másimu ba ekipa hotu ne'ebé partisipa hodi kria amizade no fortifika unidade nasionál liu husi desportu.

#MídiaMJDAK