Dili, 05 Dezembru 2025 – Ho orsamentu hamutuk US$400,000 (Dólar Amerikanu rihun atus haat ), Timor-Leste hatama ninia kontinjente boot liu hotu – Atleta na'in-135 hosi modalidade 12 – atu kompete iha SEA Games Tailandia 2025, haktuir desizaun hosi Governu Konstitusionál ne'ebé hala'o serimónia despedida ohin.

Iha serimónia despedida ne’ebé lidera husi Sua Exelénsia Ministru Juventude Desportu Arte no Kultura (MJDAK), Sr. Nelyo Isaac Sarmento akompaña husi S.E Jorge Soares Cristovão, nia subliña importánsia istóriku hosi partisipasaun ne’e.

Partisipasaun Kompleta nu'udar Membru ASEAN

"Partisipasaun ida-ne'e marka istória katak, uluk ita tuir ona SEA Games, maibé tinan ida-ne'e ita tuir SEA Games nu'udar full member ASEAN iha Bangkok," S.E. Ministru Nelyo Sarmento deklara.

Investimentu boot ne’e, ne’ebé inklui konsentrasaun preparasaun fulan rua resin, nu’udar prova Governu nia kompromisu atu hasa'e kualidade desportu nasionál. Orsamentu ne'e sei apoia federasaun sira atu garante kondisaun atleta sira-nian iha modalidade importante, inklui: Atletismu, Taekwondo, Boxe, Karate-Do, no Futeból.

Esperansa ba Medalla

Tuir Xefe Misaun, Sr. Mateus Da Cruz, alokasaun orsamentu ne'e hanesan injesaun ekonómika signifikativa ida ba Setór Desportu Federadu.

Governu nia esperansa boot mak atu investimentu ne'e bele hetan rezultadu ho medalla osan-mean, osan-mutin, ka osan-metan hosi modalidade ida ka rua. Kontinjente ne'e aranka ba Tailandia iha loron 8 Dezembru, no jogu sei hahú ho abertura ofisiál iha loron 9 Dezembru 2025, iha Bangkok.

#MídiaMJDAK