DILI, 21 Agostu 2025 – Iha ambitu parseria ho Governu Timor-Leste, Korea International Cooperation Agency (KOICA), liuhosi Project Action Office, Sra. Hyojeong Kim, fasilita formasaun ho tema “Kampañia Hasa’e Konxiénsia 2025” ba estudante akadémia futeból husi FC Makikit no FC Lafaek hamutuk na'in-50. Atividade ne'e hala'o ho susesu iha Salaun Akadémia Futeból Becora, Dili.

Importánsia Primeiru Sukoru ba Desportu

Atividade ne'e hala'o ho parseria entre KOICA no Ministériu Juventude, Desportu, Arte no Kultura (MJDAK), hodi konvida Cruz Vermelha Timor-Leste (CVTL) atu partilla informasaun esensiál kona-ba oinsá halo tratamentu primeiru sukoru.

Treinadora Primeiru Sukoru husi CVTL, Sra. Joanina Jacob Mau, esplika katak objetivu husi kampañia ne'e atu hasa'e konxiénsia estudante sira kona-ba primeiru sukoru.

"Objetivu husi atividade ne'e atu hasa'e konxiénsia estudante sira-nian oinsá mak bele halo tratamentu primeiru sukoru ba maluk seluk ne'ebé hetan asidente iha kampu laran durante jogu. Atu estudante sira mós iha ona kuñesimentu naton kona-ba hamoos kanek no tohar," dehan Sra. Joanina.

MJDAK rekoñese katak kuñesimentu kona-ba primeiru sukoru importante tebes atu garante seguransa no moris-saudavel ba atleta sira. Parseria ho organizasaun internasionál hanesan KOICA no nasionál hanesan CVTL nu'udar pasu importante hodi eleva kualidade desportu iha Timor-Leste.

Partisipa iha atividade ne'e mai husi estudante akadémia futeból FC Makikit no FC Lafaek na'in-50, hamutuk ho treinadór sira no ekipa téknika husi CVTL.

#MídiaMJDAK