DILI, 9 MARSU 2026 – Sekretáriu Estadu ba Arte no Kultura (SEAK), S.E. Jorge Soares Cristovão, hamutuk ho kuradora Loredana Pazzini-Paracciani,  anúnsia ofisialmente katak Timor-Leste sei partisipa iha Espozisaun Arte Internasionál da-61 husi La Biennale di Venezia 2026 iha Itália.

Ho títulu "Across Words / Liu Husi Liafuan", espozisaun ida-ne'e sei hala'o iha fatin prestijiadu Arsenale, Veneza, hahú husi loron-9 Maiu to'o loron-22 Novembru 2026. Partisipasaun ida-ne'e marka pasu boot ida ba diplomásia kulturál Timor-Leste nian iha nível mundiál.

Sekretáriu Estadu Jorge Soares Cristovão afirma katak ida-ne'e mak oportunidade furak hodi fahe istória, kultura, no aspirasaun artístiku Timor nian ba mundu. "Hanesan nasaun foin-sa’e ida, ita-nia prezensa iha Arsenale sei aumenta vizibilidade ba ita-nia identidade kulturál," dehan S.E. SEAK.

Paviliaun Timor-Leste nian iha tinan ida-ne'e sei aprezenta obra husi artista na'in tolu (3) ne'ebé reprezenta jerasaun oioin:

1.    Verónica Pereira Maia: Aprezenta "Tais Don", obra ne'ebé liga tradisaun orál ho istória nasionál.

2.    Etson Caminha: Aprezenta "CUALE (Sulin)", instalasaun lian imersiva ida.

3.    Juventino Madeira: Aprezenta "FRAZE NE’EBE SEIDAUK HOTU", obra vídeo ne'ebé esplora identidade sensoriál.

Tema "Across Words" nian ne'e rasik esplora oinsá diversidade linguístika iha Timor-Leste—husi dialetu bei’ala sira to'o dalen ofisiál—sai hanesan forsa unidade ne'ebé hametin nasaun.

MJDAK, liuhusi Gabinete Komunikasaun no Imprensa (GCI), sei kontinua kobre dezenvolvimentu husi preparasaun to'o abertura ofisiál iha fulan-Maiu mai ne'e, nune'e povu Timor-Leste, liuliu foin-sa'e sira, bele sente orgullu ba sira-nia artista sira.

#MídiaMJDAK