Dili, 10 Novembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), ohin hala'o audiénsia iha Salaun Magna MJDAK hodi simu atleta Defisiénsia Rona (Tilun) na'in-tolu hosi Timor-Leste. Atleta sira ne'e prontu atu aranka ba Japaun hodi partisipa iha kompetisaun Badminton Internasionál.

Atleta sira-ne'e mak Ivónia Fátima Faria Guterres, Abrão Soares da Silva Gusmão, no Domingos Freitas Belo.

Kompromisu Governu ba Dezenvolvimentu

Ministru NIS subliña katak Governu komesa ho pasu ki'ik hodi fó apoiu no enkorajamentu.

"Ha'u fiar katak imi bele. Fila fali mai Timor fahe imi-nia esperiénsia ba imi-nia kolega sira seluk ne'ebé seidauk hetan oportunidade," dehan Ministru, hodi husu atleta sira atu hametin amizade hodi haluan ligasaun ho nasaun ASIA sira.

Ministru mós fó korajen ba atleta sira atu la'ós foka de'it ba Badminton, maibé mós Tenis Meza no Atletizmu.

Apoiu ba Dala Uluk hosi MJDAK

Atleta Ivónia Fátima Faria Guterre hato'o agradesimentu hodi rekoñese apoiu MJDAK nian.

"Ami agradese tebes ba MJDAK ne'ebé fuan boot hodi simu ami no apoiu ona ami. Maske ho fundu ne'ebé ki'ik, bele fasilita ona ami-nia viajen. Ida-ne'e foin ami hetan apoiu ba dala uluk hosi MJDAK," tenik Ivónia.

Atleta sira-nia vizita ne'e la'ós atu hola parte de'it iha jogu, maibé mós atu haree no aprende hosi mundu internasionál kona-ba Defisiénsia Rona hodi fila fali mai fahe ba sira-nia maluk sira.

Ekipa sei aranka ba Japaun iha loron 11 Novembru 2025 no sei fila fali iha loron 28 Novembru 2025.

#MídiaMJDAK