DILI, 12 JANEIRU 2026– Ministru Juventude, Desportu, Arte no Kultura (MJDAK), Sua Ekselénsia Nelyo Isaac Sarmento, ohin partisipa iha reuniaun Estraordináriu Konsellu Ministrus (KM) ne’ebé hala’o iha Palásiu Governu, Dili. Reuniaun ne’e foka ba kestaun estratéjika balun kona-ba reforma administrasaun públika no kestaun finanseira Estadu nian.

Iha sorumutu ne’e, Konsellu Ministrus analiza aprezentasaun husi Ministra Finansas, Santina José Rodrigues F. Viegas Cardoso, hamutuk ho Prezidente Komisaun Funsaun Públika (CFP), Agostinho Letêncio de Deus, kona-ba inisiativa revizaun ba rejime jurídiku kontratasaun termu sertu (kontratu kazuál) iha Administrasaun Públika.

Revizaun ne’e iha objetivu hodi moderniza no hametin jestaun rekursus umanus iha instituisaun Estadu sira, inklui iha MJDAK, hodi asegura kualidade serbisu no kridibilidade kargu sira nian.

Regularizasaun Pagamentu Désimu Terseiru

Konsellu Ministrus mós analiza detallu dadus ne’ebé Ministériu Finansas aprezenta kona-ba prosesu regularizasaun ba pagamentu saláriu désimu terseiru (osan fulan 13) tinan 2025 nian. Ida-ne’e nu’udar esforsu Governu nian hodi asegura katak direitu hotu funsionáriu sira-nian bele selu tuir prosedimentu ne’ebé iha.

Nomeasaun iha Seguransa Sosiál

Alende ne’e, KM aprova mós projetu Rezolusaun ne’ebé aprezenta husi Ministra Solidariedade Sosiál no Inkluzaun, Verónica das Dores, kona-ba:

Nomeasaun Zeferino da Costa Bobo ba kargu Prezidente Konsellu Administrasaun Institutu Nasionál Seguransa Sosiál (INSS) no Prezidente Konsellu Fundu Rezerva Seguransa Sosiál.

Nomeasaun Gemito do C. Amaral de Jesus ba kargu vogál Konsellu Administrasaun INSS, hodi troka Dulce Natividade da Cunha ne’ebé rezigna-an tanba razaun saúde.

Partisipasaun Ministru MJDAK iha sorumutu Estraordináriu ne’e importante tebes hodi asegura katak polítika sira ne’ebé foti iha nível nasionál, liuliu kona-ba rekursu umanu no finansas, bele sinkroniza ho planu mudansa radikál ne’ebé MJDAK planeia ona ba tinan 2026.

#MídiaMJDAK