Aileu, 25 Agostu 2025 – Sua Exelénsia Primeiru-Ministru Repúblika Demokrátika Timor-Leste (RDTL), Kay Rala Xanana Gusmão, ohin loke ofisiálmente Semana Akampamentu Nasionál ba Foinsa’e ho Defisiénsia iha Timor-Leste. Akampamentu ne'e hala'o iha Suku Seloi Kraik, Postu Administrativu Laulara, Munisípiu Aileu.

Atividade ne'e ho tema sentrál: “Formasaun, Edukasaun Sivika, Diálogu, Reflesaun, Fahe Esperiénsia, Animasaun, Konsulta Saúde” no sei kúlmina ho Selebrasaun Loron Konsulta Populár (30 Agostu 2025).

Mensajen PM Xanana Gusmão: "La Bele Husik Ema Ida Iha Kotuk"

Iha serimónia abertura, S.E. Primeiru-Ministru Xanana Gusmão hato'o nia apresiasaun boot ba akampamentu ne'e, no subliña prinsipiu báziku Governu Konstitusionál IX nian kona-ba inkluzaun:

"Akampamentu ida-ne'e merese tebes apresiasaun, no labele husik ema ida iha kotuk, tanba ita hotu mak Timoroan," Primeiru-Ministru hateten.

PM Xanana Gusmão mós promete katak sei hasoru malu fali ho partisipante sira iha loron 30 Agostu 2025, hodi komemora Loron Konsulta Populár no hodi ensera atividade akampamentu ne'e.

Partisipasaun Multifasetada no Inkluziva

Semana Akampamentu ne'e halibur hamutuk total partisipante hamutuk 150 foinsa’e ho defisiénsia husi munisípiu lima (5): Aileu, Ainaru, Covalima, Manufahi, no Dili.

Iha abertura ne'e hetan partisipasaun husi entidade Governu no parseiru dezenvolvimentu importante sira, inklui:

·       Ministru Juventude, Desportu, Arte no Kultura (MJDAK).

·       Sekretária Estadu Igualdade Jéneru no Inkluzaun.

·       Prezidente Autoridade Munisípiu Aileu.

·       Provedoria Direitus Umanus no Justisa (PDHJ).

·       Ajénsia internasionál hanesan UNICEF no DFAT.

·       Diretór-Jerál Juventude MJDAK, Diretór Nasionál SECOMS, no ADTL.

Akampamentu ne'e hanesan ezemplu konkretu husi kompromisu Governu nian atu investe iha dezenvolvimentu inkluzivu, fó oportunidade ba foinsa'e ho defisiénsia sira atu hetan formasaun sivika no fahe esperiénsia.

#MídiaMJDAK