DÍLI, 19 Jullu 2025 – Serimónia abertura ofisiál ba XII Jogos Desportivos da CPLP 2025 iha Dili adia tiha ba oras 18:00 (OTL), hosi horáriu inisiál ne’ebé determina ona. Desizaun ne’e foti atu garante inkluzaun ba delegasaun hotu-hotu, liuliu delegasaun husi nasaun Afrikanu, ne'ebé foin to'o iha Dili.

Iha konferénsia imprensa ne’ebé hala’o iha Sentru Konvensaun Dili (CCD), Ministru Juventude, Desportu, Arte no Kultura, Sua Exelénsia Nelyo Isaac Sarmento, esplika razaun ba adiamentu ne’e. "Ami muda oras abertura hodi garante katak la husik liu delegasaun ida atu lakon momentu istóriku ne’e. Jogos ida ne’e mak plataforma unidade ba nasaun CPLP sira," dehan nia.

Ministru mós fó informasaun kona-ba delegasaun sira-nia to’o iha Dili. Voo primeiru ne'ebé to’o iha oras 16:35 lori pasajeiru hamutuk 122, inklui atleta no ekipa téknika husi São Tomé e Príncipe (32), Moçambique (38), Angola (33), no Cabo Verde (19). Iha voo daruak ne'ebé tuir planu sei to’o iha oras 18:45, sei lori pasajeiru hamutuk 137 hosi Cabo Verde no Angola.

Kona-ba públiku, Ministru Nelyo rekoñese katak Estadiu Munisipál Dili la bele akomoda ema barak. Maibé, nia garante katak komunidade sei bele haree serimónia abertura liu husi ekran boot ne'ebé prepara ona iha área Estadiu Munisipál, inklui mós ekran iha CCD. Serimónia ne’e mós sei transmite direta liuhusi Rádiu Televizaun Timor-Leste (RTTL, E.P.) no plataforma média online sira seluk.

Ministru konklui hodi husu ba komunidade atu "hamutuk fó apoiu no koordinasaun dame, tanba ne'e orgullu boot ba Timor-Leste." Maski oras muda, programa kulturál no entrada delegasaun sira sei la'o tuir planu atu selebra unidade no fraternidade entre Estadu-membru CPLP sira.

#MídiaMJDAK