DILI, 26 Fevereiru 2026 — Ministru Juventude, Desportu, Arte no Kultura (MJDAK), Nelyo Isaac Sarmento, realiza enkontru ho Federasaun Voleiból Timor-Leste (FVTL) hodi diskute proposta kria Orgaun Liga Voleiból Nasional iha Timor-Leste. Enkontru ne’e hala’o iha Salaun Magna MJDAK, Lecidere.

Objetivu prinsipál husi inisiativa ne’e mak atu identifika no halibur atleta sira ne’ebé iha poténsia atu integra iha preparasaun ekipa nasionál ba Southeast Asian Games 2027.

Durante reuniaun, parte sira diskute pontu estratéjiku sira, inklui mekanizmu identifikasaun atleta potensiál iha nivel lokal, modelu kompetisaun liga nian, no definisaun regra tékniku atu asegura kompetisaun ne’ebé justu no transparente.

Ministru Nelyo Isaac Sarmento enfatiza katak kria liga sei sai hanesan plataforma importante atu hadia nivel kompetitividade desportu voleiból nasional no prepara atleta sira ho planeamentu ne’ebé estruturadu.

“Ita-nia tarjetu mak Sea Games. Tan ne’e, Governu iha hanoin kria Liga Voleiból atu ita bele identifika atleta sira ne’ebé iha prestasaun di’ak ba kompetisaun ne’e,” dehan Ministru Nelyo Isaac.

Partisipa mos iha enkontru ne’e, Diretór Jerál Desportu, João M. Rodrigues, Prezidente FVTL, Inocêncio de Araújo, hamutuk ho kargu xefia no ekipa tékniku husi federasaun no MJDAK.

Inisiativa ne’e reflete komitmentu Governu atu hametin sistema kompetisaun nasional no promove preparasaun ne’ebé konsistente atu eleva prestasaun Timor-Leste iha arena desportiva rejional.

#MídiaMJDAK