LAUTÉM, 12 Setembru 2025 – Ministériu Juventude, Desportu, Arte no Kultura (MJDAK), liuhosi Diresaun Nasionál Dezenvolvimentu Juventude (DNDJ), kolabora ho Sentru Dezenvolvimentu Juventude Lautém (SDJL) hodi realiza formasaun edukasaun relasaun saudavel durante loron lima, hahú hosi 8 to'o 12 Setembru.

Formasaun ne'e ho objetivu atu kapasita joven feto no mane hamutuk 29 hodi bele prevene kazu krítiku hanesan kazamentu sedu, moras seksuál hada'et, no violénsia doméstika.

Atividade ne’e hetan apoiu husi Fundu Nasoins Unidas ba Populasaun (UNFPA) no partisipa hosi estudante no profesór sira husi Ensinu Sekundáriu Jerál Lautém. Serimónia loke ofisiálmente husi Administradór Postu Lautém, Anacleto Fernandes.

Joven Nu’udar Oportunidade no Dezafiu Nasionál

Iha ninia intervensaun ba enseramentu, Diretór Nasionál Firminio Dias Quintas Soares salienta katak joven sira nu'udar rekursu boot ba nasaun, tanba sira reprezenta pursentu 72 husi populasaun iha idade entre 15 to'o 35. Maski nune'e, nia hateten joven sira bele sai dezafiu ka oportunidade ba dezenvolvimentu nasaun nian.

Diretór Firminio esplika katak formasaun edukasaun relasaun saudavel ne’e importante tebes atu rezolve kestaun krítiku sira hanesan isin-rua la planeadu, moras hada'et, no kazamentu sedu, ne'ebé mosu tanba falta konsiénsia no matenek kona-ba saúde reprodutiva.

"Joven sira mak futuru ba nasaun ida-ne'e. Prepara imi nia an fízikamente, mentalmente, no sosiálmenteatu lori Timor-Leste ba dezenvolvimentu no prosperidade," dehan Diretór Firminio. Nia enkoraja joven sira atu evita hahalok sira ne'ebé la saudavel, foka ba harii sira-nia mehi, no kuda domin no kompaixaun hodi kria futuru ne'ebé nabilan liután.

Antuziazmu Partisipante sira-nian

Jestór Sentru Dezenvolvimentu Juventude Lautém espresa orgulhu ba joven foin-sa’e sira-nia antuziazmu atu tuir formasaun ne'e no deklara katak formasaun ne'e hanesan "buka'e ida ba futuru" hodi fó matenek kredivel ba sira.

Iha fatin hanesan, estudante ida husi Ensinu Sekundáriu Jerál Lautém hateten katak sente kontente tebes no promete sei fahe esperiénsia no informasaun ne'ebé hetan ba kolega sira seluk ne’ebé la partisipa.

#MídiaMJDAK