DILI, 4 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa no lansa ofisiálmente serimónia abertura ba eventu "Imaculada Cup 2025" iha resintu Arkedioseze Dili, Lecidere.

Eventu ne'e hanesan parte husi selebrasaun boot atu komemora tinan 85 ezisténsia Arkedioseze Dili nian no sei hala'o durante fulan tolu (3) nia laran.

MJDAK Kuda Valór Kultura ba Jerasaun Foun

Iha ninia intervensaun, Ministru Nelyo Isaac Sarmento deklara katak ninia prezensa no partisipasaun Governu nian la'ós de'it atu haksolok, maibé atu servisu hamutuk hodi selebra eventu ne'e. Nia hatutan katak hanesan obrigasaun MJDAK nian atu kuda valór kultura sira ba jerasaun foun liuhusi atividade pozitivu sira.

"Ha'u mai iha ne'e la'ós atu haksolok de'it maibé atu hola parte ba atividade sira hodi selebra tinan 85 Arkedioseze Dili nian. Ne'e hanesan obrigasaun ida, tanba ida ne'e responsabilidade MJDAK nian," Ministru dehan.

Ministru mós espresa nia esperansa katak inisiativa sira hanesan ne'e bele eduka jerasaun foun, liuliu liu husi atividade ho sentidu pozitivu ne'ebé ajuda labarik sira rekoñese sira-nia identidade rasik.

Komponente Multikulturál Eventu nian

Pe. Mariano Quintao do Rego, nu'udar Prezidente Komisaun Organizadora "Imaculada Cup 2025," hateten katak sira-nia atividade hetan apoiu másimu husi Amo Cardeal Dom Virgílio do Carmo da Silva, SDB, inklui parókia sira hotu iha Dili.

"Imaculada Cup 2025" sei kobre komponente lima (5) ne'ebé liga ho kultura no desportu, hodi atrai joven barak:

1. Jogu Futsál (mane no feto Sub-12).
2. Sirtame (literária/koñesimentu).
3. Pintura.
4. Solo Vokál.
5. Dansa Tradisionál.

Serimónia abertura hetan partisipasaun husi Amo Cardeal Dom Virgílio do Carmo da Silva, SDB, padre sira, madre sira, no eskuteiru sira, hodi hatudu unidade hodi promove juventude Timor-Leste nian.

#MídiaMJDAK