Atambua, 27 Juñu 2026 – S.E. Sekretariu Estadu ba Arte no Kultura (SEAK) Jorge Soares Cristóvão, hamutuk ho Diretor Jeral SEAK, Sr. Gil Paulino dos Santos Oliveira, partisipa atividade Fashion Show Tais Tenun iha Belu Atambua, hanesan parte husi Festival Fulan Fehan NTT 2026.

Festival Fulan Fehan NTT ne'e organiza ho objetivu atu konkretiza espíritu relasaun entre Atambua ho Timor-Leste, tanba Atambua hanesan fatin sentral ba relasaun kultural entre rai rua. Festival ida ne'e realiza tiha ona ba dala 4 no kontinua kada tinan iha fulan Juñu.

Iha eventu ne'e, Timor-Leste hola parte iha atividade animasaun kultural, múzika no fashion show, ne'ebé hatudu rikeza kultura no identidade nasionál liu husi tais tenun.

"Partisipasaun SEAK iha festival ida ne'e refleta kompromisu Governu Timor-Leste nian atu fortalese relasaun di'ak ho vizinhu sira liu husi kooperasaun kultural, no mós promove arte no kultura timor-oan ba internasional," hateten deklarasaun ofisiál.

Partisipasaun SEAK iha atividade ne'e mós hetan akompañamentu husi Prezidente Autoridade Munisipiu Dili (PAM Dili) no Asesor Casa Sivil.

Prezensa iha atividade ne'e mós involve Ministru Interior Indonésia, Vise Ministru Interior Indonésia, Gobernur NTT, Bupati Belu, no konvidadus importante sira.

Eventu ida-ne'e mós sai plataforma importante atu promove tais tenun ne'ebé nu'udar patrimóniu kultural Timor-Leste nian, no mós hametin identidade kultural iha nivel rejional.

*Kultura hametin rai rua, tais tenun hametin identidade. *

#MediaSeak