DILI, 18 Jullu 2025 – Hafoin entrada delegasaun sira-nian ba XII Jogos CPLP 2025, Ministru Juventude, Desportu, Arte no Kultura (MJDAK), Nelyo Isaac Sarmento, no Sekretáriu Estadu Arte no Kultura (SEAK), Jorge Soares Cristovao, partisipa ona iha rituál lisan importante ida hamutuk ho lia-na'in husi lisan Lakoto Rumbia nian, iha Sentru Konvensaun Dili (CCD).

Objetivu husi rituál lisan ne'e mak atu husu lisensa no bensaun husi beiala sira hodi garante katak Jogos Desportivu CPLP ne’e sei la’o ho susesu, dame, no laiha obstákulu. Aleinde ne’e, rituál ne’e mós husu protesaun ba atleta no delegadu hotu-hotu hosi nasaun CPLP nian, hodi asegura sira-nia seguransa durante sira-nia hela iha Dili to’o sira fila fali ba sira-nia rai.

Prezensa husi ekipa Komité Organizadór (CTA), Diretores-Jerais, Asesores, Voluntáriu Joven sira, no reprezentante Média sira iha fatin ne’e, hatudu unidade no kolaborasaun iha preparasaun ba eventu internasionál boot ida-ne'e.

Rituál lisan ne'e reflete koneksaun entre modernidade ho valór kulturál, no hatudu katak kultura la'ós de'it istória, maibé mós forsa ida ne'ebé bele fó diretu ba futuru hodi promove desportu no unidade. Ne'e hanesan parte ida husi Timor-Leste nia ospitalidade ne'ebé nakloke ba mundu tomak.

#MédiaMjdak