DILI, 20 Jullu 2025 – Iha kuadru XII Jogos Desportivos CPLP 2025, Planu Étika Desportiva CPLP hamutuk ho Komisaun Nasionál Desportu (KND) organiza Konferénsia Nasionál Étika Desportiva ba federasaun desportiva sira hotu iha Timor-Leste. Konferénsia ne’e hala’o ho objetivu atu hametin jogu limpu (fair play), integridade desportiva, no kumprimentu ba “Law of the Game” husi federasaun internasionál sira, inklui edukasaun kontra dopajen, hodi garante ambiente kompetisaun ne'ebé justu no saudavel.

Tópiku Importante sira iha Diálogu

Konferénsia ne’e halo diskusaun no aprezentasaun kona-ba pontu prinsípál sira, hanesan:

·       Importánsia étika iha desportu — aprezenta hosi José Lima.

·       Papél ajente, treinadór no ofisiál iha formasaun atleta sira — aprezenta hosi André Carvalho.

·       Desportu hanesan ferramenta pedagójika — aprezenta hosi Rosário Rodrigues.

·       Étika iha mundu servisu — aprezenta hosi Eduarda Marques.

Diskusaun meza hamutuk, ne’ebé modera hosi José Lima no Jorzita Quaresma, fó dadus kona-ba pratika di’ak hosi nasaun-membru CPLP sira.

Ministru Sarmento Ensera no Fó Énfaze ba Étika

Sua Exelénsia Ministru Juventude, Desportu, Arte no Kultura, Nelyo Isaac Sarmento, ensera ofisiálmente konferénsia ne’e. Iha ninia intervensaun, Ministru Sarmento subliña katak étika desportiva mak matadalan ba federasaun sira atu evita falla no kumpri regra internasionál sira.

Konferénsia ne’e mós hetan prezensa hosi figura importante sira, hanesan Embaixadora Portugal iha Timor-Leste, Kordenadór Planu Étika Desportiva CPLP Philip Barvestock, delegasaun husi Kabu Verde, São Tomé no Príncipe, Angola, reprezentante Sekretáriu Ezekutivu CPLP, no representante husi Timor-Leste (KND no federasaun sira).

Lídia Praça (Vogal IPDJ) lori mensajen boot ida:

“Desportu sei la la’o ho di’ak bainhira laiha valór no étika.” Nia agradese hospitalidade husi povu timorense no reforsa prinsipiu respetu, integridade, inkluzaun no solidariedade ne’ebé CPLP rona hela.

Konferénsia ne’e mós selebra parserias entre Portugal, Kabu Verde, no Brazíl ho fokus ba nasaun foun benefisiáriu sira: Timor-Leste no Giné Ekuatoriál.

#MídiaMJDAK