DILI, 29 Jullu 2025 – Diresaun Nasionál Asosiativizmu Juventude (DNAJ) husi Ministériu Juventude, Desportu, Arte no Kultura (MJDAK), liuhosi Diretór Nasionál Sr. Mário Tilman, ohin sai oradór ba semináriu loron ida kona-ba akampamentu husi organizasaun Juventude Hadomi Natureza (JHN). Atividade ne'e realiza iha Suku Fatisi, Postu Administrativu Laulara, Munisípiu Aileu.

Konservasaun Biodiversidade no Komitmentu Governu

Iha intervensaun husi Diretór DNAJ Mário Tilman nian, nia foka ba tema ne'ebé DNAJ lori: "Konservasaun Biodiversidade no Juventude." Nia esplika katak Biodiversidade refere ba kriatura moris ho variasaun iha jeru, espesie, no ekosistema sira-nia abitát rasik.

Diretór Mário Tilman realsa komitmentu MJDAK nian atu apoia JHN hodi kontinua dezenvolve joven sira:

"Ministériu Juventude, Desportu, Arte no Kultura iha komitmentu apoia sira hodi kontinua dezenvolve joven sira ba oin. Liuliu liga ba Juventude Hadomi Natureza, ne'ebé sempre hetan apoiu husi MJDAK atu nune'e sensibiliza ba Formasaun Karakter no mudansa jovem sira-nia karakter atu sensível ba ambiente."

Nia afirma katak inisiativa ne'e kontribui ba Polítika Nasionál Juventude nian ho tematiku ida mak Juventude iha Partisipasaun Siviku, ne'ebé Governu iha komitmentu atu apoia nafatin.

JHN no "Eskola Ailaran"

Iha fatin hanesan, Prezidente Komisaun JHN, Sr. Resovaldo Sales Da Silva, hatete katak sira-nia "Eskola Ailaran" prefere liu ba eskola sekundária sira. Ba tinan ne'e, sira foka liu ba eskola sekundária tolu (3) iha Munisípiu Aileu (Eskola Sekundária Cristal Aileu, ESTV Aileu, no Eskola Sekundária Malere) no eskola sira iha Dili (Eskola Sekundária Cristal Balide, Paulus VI, no mós Universidade).

Sr. Resovaldo esplika katak referénsia ba "Eskola Ailaran" foti husi esperiénsia uluk Avo Nana (PM Xanana Gusmão), tanba uluk iha tempu funu, nia hanorin vizaun polítika ba revolusionáriu sira atu kontra invazór sira. Materia dahuluk mak Joven sira tenke hatene: hatene aan rasik, tahan moris iha ailaran (skill survival), no Primeiru Sokuru.

Partisipante hamutuk 124 (Mane 48, Feto 76) husi akampamentu ne'e hatudu entuziazmu boot hodi aprende, tanba barak sente katak ida ne'e hanesan buat foun ba sira-nia moris loron-loron nian.

#MídiaMJDAK