DILI, 27 MARSU 2026 – Ministériu Juventude, Desportu, Arte no Kultura (MJDAK), simu kordenasaun husi Ministériu Planeamentu no Investimentu Estratéjiku (MPIE) hodi realiza workshop elaborasaun kona-ba preparasaun Plano Médiu Prazu (PMP) 2027-2030, ne’ebé hala’o iha Salaun Magna MJDAK, Lecidere, Dili.

Workshop ida-ne’e nu’udar kontinuasaun husi esforsu integradu hodi foti desizaun kona-ba prioridade dezenvolvimentu nasionál ba tinan lima oin mai. Atividade ne'e partisipa husi kargu Diretores sira, Xefe Gabinete, no Asesór sira husi Sekretaria Estadu Arte no Kultura (SEAK) no MJDAK.

Objetivu  prinsipál husi enkontru ne'e mak atu halo diskusaun kle'an no validasaun ba dokumentu planeamentu ne'ebé MPIE aprezenta ona. MJDAK foti parte ativu hodi avalia relevánsia intervensaun sira, nune'e bele hato'o sugestaun alterasaun ne'ebé nesesáriu tuir reallidade iha setór juventude, desportu, arte no kultura.

Diskusaun ne’e bazeia ba Rezolusaun Governu n.º 43/2024, ne’ebé kria estrutura koordenasaun ba setór haat (4) prinsipál:

1.    Setór Infraestrutura: Koordenadu husi MPIE.

2.    Setór Dezenvolvimentu Institusionál: Koordenadu husi MPIE.

3.    Setór Sosiál: Lidera husi Vise-Primeiru-Ministru II (ne’ebé kobre mós área kbiit MJDAK nian).

4.    Setór Ekonómiku: Lidera husi Vise-Primeiru-Ministru I.

Rezultadu ne'ebé espera husi workshop ne'e mak atu hetan konsensu inisiál kona-ba baseline, indikadór, no meta (targets) ne'ebé mensurável. Planu ne’e sei sai baze fundamental hodi aliña planu setoriál MJDAK nian ho Meta Nasionál to’o tinan 2030, hodi asegura efisiénsia no impaktu reál ba povu.

#MídiaMJDAK