GLENO, ERMERA, 16 JUÑU 2026 – Ba ema balu, US$1.000 karik osan ki'ik ida de'it. Maibé ba Beni Alves Martins, foinsa'e husi Gleno, Munisípiu Ermera, osan ne'e sai pontu hahú ida ne'ebé muda nia moris tomak. Ho osan emprestimu husi nia avó no apoiu husi nia inan, Beni hahú nia negósiu ho komputadór ida no printer ida de'it. Ohin loron, esforsu ne'e nakfilak sai empreza ki'ik ida ne'ebé la'ós de'it sustenta nia moris, maibé mós fó oportunidade servisu ba joven na'in-6 iha nia komunidade.

Empreza ne'e hanaran RATOKA (Ran Timor Oan Kakutak Arte), naran ida ne'ebé ohin sai simbolu perseveransa, kreatividade, no espíritu empreendedór husi foinsa'e Timor-oan ida.

Dalabarak, susesu hahú husi tempu ne'ebé difísil liu. Hanesan mos ho Beni. Depois de remata ensinu sekundáriu, nia mehi atu kontinua estudu iha universidade. Maibé situasaun ekonomia família nian la permite atu nia kontinua estudu.

"Iha momentu ne'ebá, ha'u sente triste tebes tanba la bele kontinua estudu. Ha'u haree kolega sira seluk remata universidade no sai graduadu, maibé ha'u tenke buka dalan seluk atu kontinua moris," dehan Beni.

Iha tempu ne'ebá, nia tenke hili entre lamenta situasaun ka koko kria oportunidade ida ba nia futuru. Ikus mai, nia deside atu tama ba mundu negósiu. Maski aman seidauk fiar loos ba nia desizaun, nia inan nafatin fó apoiu no motivasaun. Ho tulun família nian, Beni empresta US$1.000 husi nia avó hodi hahú negósiu fotokópia ki'ik ida.

Iha inísiu, Beni iha de'it komputadór ida no printer ida. Nia tenke kompete ho negósiu sira seluk ne'ebé boot liu no iha ekipamentu kompletu ona. Maibé nia la tauk. Nia aprende oinsá atu jere osan ho di'ak, atende kliente ho respeitu, no asegura katak servisu ne'ebé nia fó sempre iha kualidade di'ak.

Objetivu ida de'it mak iha nia ulun: oinsá bele selu fila-fali osan emprestimu no halo negósiu ne'e kontinua moris. Dalabalu, dezafiu la mai de'it husi falta osan. Iha tempu balu, joven sira iha bairru mai halo barullu iha oin rental nian, no dala ruma nia tenke husu apoiu husi PNTL atu rezolve situasaun. Maibé ba Beni, problema sira-ne'e sai hanesan lisensa ida atu aprende.

"Negósiu la fasil. Ita hasoru karakter ema oioin. Maibé husi situasaun sira-ne'e mak ha'u aprende atu sai forte liután no hatene oinsá hasoru problema ho kalma," nia hatete.

Ho tempu no servisu maka'as, RATOKA kontinua dezenvolve. Ohin loron, empreza ne'e konsege emprega joven na'in-6 no sai fonte rendimentu ba família barak. Ba Beni, susesu boot liu la'ós tanba nia bele sosa motór ka kareta ba nia an rasik. Susesu boot liu mak tanba nia bele fó servisu ba maluk sira no ajuda sustenta nia alin sira atu kontinua estudu.

"Ha'u la hakarak ha'u nia alin sira hasoru difikuldade hanesan ha'u. Tanba ne'e, ha'u servisu maka'as atu bele ajuda sira kontinua estudu," dehan nia.

Atu adapta ho mudansa tempu nian, Beni la depende de'it ba servisu fotokópia. Nia komesa uza plataforma dijitál hanesan TikTok hodi promove nia negósiu no dada kliente barak liután. Estratégia ida-ne'e ajuda RATOKA atu kontinua moris no dezenvolve iha tempu ne'ebé kompetisaun aumenta ba beibeik.

Ba Beni, buat importante liu mak atitude no vontade atu hahú. Nia fiar katak joven sira la presiza hein de'it atu ema seluk kria servisu ba sira. Pelo kontráriu, sira tenke uza talentu, koñesimentu no kreatividade ne'ebé iha atu kria oportunidade ba sira nia an no ba ema seluk.

Iha nia mensajen ba foinsa'e Timor-Leste sira, Beni hatete:

"Karik ita iha talentu ka esperiénsia ruma, koko dezenvolve. Lalika tauk atu foti risku no hasoru dezafiu. Dala ruma ita monu, maibé husi ne'ebá mak ita aprende. Servisu la presiza ita hein de'it; ita bele kria rasik oportunidade ba ita nia an no ba ema seluk."

Hosi komputadór ida no printer ida de'it, Beni Alves Martins prova katak korajen, perseveransa no servisu maka'as bele transforma difikuldade sai oportunidade. Istória RATOKA hatudu katak bainhira foinsa'e ida fiar ba nia mehi no la entrega an ba dezafiu sira, susesu la'ós de'it muda nia moris rasik, maibé bele muda mós moris ema seluk sira iha nia família.

#MediaMjdak