Aileu, 12 Novembru 2025 – Iha Munisípiu Aileu Vila, ne'ebé nu'udar sasin ba Luta Nasionál, selebrasaun Loron Nasionál Juventude (LNJ) ba Dala XX remata ona ho akontesimentu ne'ebé sei sai istória. Pontu ne'e la'ós de'it atu komemora Memória, maibé atu transfere ofisiálmente Esperansa hosi Aileu ba Jerasaun foun iha Munisípiu seluk.

S.E. Prezidente Repúblika, Dr. José Ramos Horta, hamutuk ho S.E. Ministru MJDAK, Sr. Nelyo Isaac Sarmento, Partisipa iha serimónia finál ne'e, hodi hametin katak Juventude nia futuru nu'udar asuntu Estadu nian.

Rotasaun nu'udar Testemu: Manatutu Simu Knaar Luta Foun

Momentu emosionál liu mak wainhira S.E. Prezidente Repúblika Dr. José Ramos Horta rasik hahú serimónia ofisiál Dada Rifa ba fatin LNJ tinan tuir mai.

Asaun simboliku hosi Xefe Estadu ne'e hatudu katak Planu Rotasaun Nasionál ba LNJ ne'e nu'udar desizaun estratéjiku atu lori investimentu no oportunidade Juventude (hanesan eventu, desportu, no arte) ba teritóriu nasionál tomak.

Rezultadu ofisiál fó sai: Munisípiu Manatutu sei sai uma-na'in ba Loron Nasionál Juventude 2026.

Entuziazmu hosi Juventude Aileu, ne'ebé bele sente iha serimónia ne'e, simu Manatutu nu'udar testemu ba knaar rotasaun ne'e, hodi garante katak dezenvolvimentu sei inkluzivu no la'ós foka de'it iha kapitál.

Kompromisu Ministru NIS: Investimentu Luta PEJI-M

Ministru MJDAK, Sr. Nelyo Isaac Sarmento, iha fahe Prémiu ba parseiru sira ne'ebé partisipa iha Programa Empoderamentu Juventude Inter-Ministeriál (PEJI-M), fó klaresimentu kona-ba ligasaun istóriku ho futuru:

"PEJI-M ne'e hanesan dalan atu transfere Memória Luta (Santa Cruz) ba Esperansa Dezenvolvimentu (Aileu)."--- S.E. Ministru Nelyo Isaac Sarmento

Mensajen ne'e hatudu katak LNJ la'ós de'it komemorasaun simbóliku, maibé nu'udar investimentu Governu nian atu kria oportunidade ekonómiku no sosiál ba Juventude. Programas hanesan PEJI-M ne'e nu'udar rezultadu hosi luta ne'ebé lori Timor-Leste ba Pás, agora iha knaar atu lori Timor-Leste ba Dezenvolvimentu.

Prezensa unida entre Lideransa Máxima Estadu nian iha Aileu hametin valór esensiál hosi Luta 12 Novembru: Unidade, Pás, no Kompromisu tomak Estadu nian ba futuru Juventude Timor-Leste nian.

#MídiaMJDAK