DILI, 15 Setembru 2025 – Ministériu Planeamentu no Investimentu Estratéjiku (MPIE) hala'o hela Diskusaun Grupu Nível-Aas (Focus Group Discussion – FGD) durante loron tolu (15-17 Setembru) iha Hotel Timor. Atividade ne'e ho títulu: "High-Level Focus Group Discussion Toward the Advancement of Sustainable Development and Economic Diversification" ho objetivu atu avalia Planu Dezenvolvimentu Estratéjiku (PED) 2011–2030 no halibur hanoin sira ba Planu Dezenvolvimentu Médium Prazu (PDMP) 2026–2035.

Iha diskusaun importante ne'e, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa ativamente hodi kontribui ho ninia perspetiva esensiál kona-ba dezenvolvimentu rekursu umanu, liu-liu iha área juventude, desportu, arte, no kultura.

Avaliasaun PED 2011–2030: Progresu no Dezafiu

Avaliasaun inisiál ba PED 2011–2030, ne'ebé Governu Timor-Leste enkomenda, hatudu progresu signifikativu iha área hanesan matrikula eskolár no saúde inan nian. Maibé, relatóriu ne'e identifika mós dezafiu boot sira, inklui: Volatilidade fiskál; Oportunidade servisu ne'ebé sei limitadu ; Dependénsia ba reseita husi Mina-rai no Fragmentasaun institusionál.

Ministru Planeamentu no Investimentu Estratéjiku, Gastão Francisco de Sousa, subliña katak:

"Avaliasaun ne'e la'ós de'it ezersísiu ida kona-ba relatóriu realizasaun sira, maibé nu'udar momentu reflesaun nasionál ida. Liuhosi diálogu ne'e, ami hakarak garante katak ami-nia dalan dezenvolvimentu futuru nian la'ós de'it inklui lisaun husi pasadu, maibé mós hatán ba ezijénsia sira hosi ami-nia povu."

Dezenvolvimentu Juventude Nu'udar Prioridade Estratéjiku

Partisipasaun MJDAK nian iha FGD ne'e hatudu duni katak dezenvolvimentu juventude no desportu konsidera nu'udar parte kritiku tebes husi ajenda reforma nasionál. PDMP 2026–2035 hanesan oportunidade istóriku ida atu muda papél Estadu nian husi autór ekonómiku prinsipál ba fasilitadór inisiativa privadu, no husi planeamentu ne'ebé haketak ba governasaun ne'ebé integradu.

Diskusaun ne'e halibur hamutuk Ministru sira, peritu tékniku sira, parseiru dezenvolvimentu, reprezentante sosiál sivíl, no lider husi setór privadu. Rezultadu husi FGD ne'e sei lori mai hanoin klaru sira ne'ebé bele define prioridade, objetivu ne'ebé bele sukat, no opsaun polítika ne'ebé kredível ba Planu Médium Prazu ne'ebé inkluzivu.

#MídiaMJDAK