DILI, 20 Jullu 2025 – Sua Exelénsia Ministru Komérsiu no Indústria (MCI), Filipus Nino Pereira, loke ona ofisiálmente Feira Kulturál Komunidade País Lian Portugés (CPLP) iha Centro Convenção de Díli (CCD).

Feira kulturál CPLP ne’e hala’o ho tema jerál: “Sabores, Sons e Cores da CPLP num só lugar” (Sabor, Lian no Kór CPLP nian iha fatin ida de’it).

Selebra Diversidade Kultural iha XII Jogos CPLP

Feira ne’e nakloke ba públiku tomak hodi asesu no haree atividade artezaun no joven kreativu sira-nian. Atividade ne'e sai hanesan parte integrál hosi XII Jogos Desportivos CPLP 2025 ne’ebé hala'o hela iha Timor-Leste.

Feira ida-ne’e sei anima hosi: Múzika; Konvíviu (Konvivénsia); Gastronomia;Espozisaun arte no pintura.

Ministru MCI enkoraja komunidade luzofonia sira atu vizita stand sira hotu ne'ebé prepara hosi komunidade, atu bele haree no hola produtu kreativu sira.

Feira Kulturál CPLP ne’e hahú iha loron 20 Jullu no sei remata iha loron 26 Jullu 2025.

Partisipasaun Institusionál

Abertura feira kulturál ne’e hetan partisipasaun másimu hosi entidade sira ne'ebé reprezenta membru CPLP, Sekretáriu Estadu Arte no Kultura, Diretór Jerál Arte no Kultura, Diretór Jerál Desportu, no komunidade tomak.

#MídiaMJDAK