DÍLI, 13 JANEIRU 2026 (MÍDIA MJDAK) – Federasaun Futeból Timor-Leste (FFTL) hala’o ona serimónia lansamentu ofisiál ba kampionatu Taça da Liga 2026, ne’ebé dekorre iha Salaun Hotel Timor, Dili, Tersa-feira ne’e.

Serimónia ne’e lidera husi Prezidente FFTL, Sr. Nilton Telmo dos Santos, no hetan onra ho prezensa husi Sua Eskelénsia Sekretáriu Estadu ba Arte no Kultura (SEAK), Jorge Soares Cristóvão, ne’ebé reprezenta Ministériu Juventude, Desportu, Arte no Kultura (MJDAK).

Marka prezensa mós iha eventu ne’e, Sua Eskelénsia Primeiru-Ministru, Kay Rala Xanana Gusmão, ne’ebé partisipa iha kadiak nu’udar Prezidente Klube AD SLB, hamutuk ho Ministru Administrasaun Estatál (MAE), Tomás do Rosário Cabral, no Ministru Obra Públika (MOP), Gastão de Sousa.

Kampionatu Taça da Liga 2026 sei partisipa husi klube hamutuk 13, mak hanesan: Karketu Dili FC, AD SLB, Emmanuel FC, Aitana FC, Santa Cruz FC, Coração FC, DIT FC, FC Porto Taibesi, Assalam FC, AS Marca, Lica-Lica FC, Fiel FC, no Nagarjo FC.

Tuir kalendáriu, abertura boot sei hala’o iha loron Sábadu, 17 Janeiru 2026, iha Estádiu Munisipál Dili, ho jogu dahuluk entre ekipa AD SLB kontra Emmanuel FC. IX Governu Konstitusionál liuhosi MJDAK kontinua fó apoiu tomak ba FFTL hodi dezenvolve kualidade futeból nasionál ne'ebé profisionál no disiplina.