DÍLI, 29 DEZEMBRU 2025 – Ministériu Juventude, Desportu, Arte no Kultura (MJDAK) liuhosi Sua Exelénsia Ministru, Nelyo Isaac Sarmento, hamutuk ho Diretór-Jerál Desportu, João M. Rodrigues, entrega ofisialmente prémiu ba atleta sira ne’ebé konsege lori naran di’ak ba nasaun iha kompetisaun Jogos Desportivos da Comunidade dos Países de Língua Portuguesa (CPLP) 2025. Serimónia ne’e hala’o iha Salaun Magna MJDAK, Lecidere, Díli.

Atribuisaun prémiu ne’e hanesan forma rekoñesimentu hosi Governu ba esforsu no dedikasaun atleta sira-nian ne’ebé hatudu prestasaun aas hodi konkista medalla iha eventu desportivu prestijiadu ne’e.

Iha nia diskursu, Ministru Nelyo Isaac Sarmento (NIS) hateten katak inisiativa ne’e iha objetivu atu motiva nafatin talentu joven sira hodi kontinua treinu no dezenvolve sira-nia kapasidade ba futuru.

“Governu fó rekoñesimentu ida ne’e hodi motiva ita-nia atleta sira, liuliu sira ne’ebé ho idade sei joven tebes, atu kontinua haburas sira-nia talentu. Ita hakarak sira pratika desportu ho badinas hodi bele hatudu prestasaun ne’ebé di’ak liután iha futuru. Prémiu ne’e mós nu’udar apresiasaun ba treinadór sira ne’ebé fó ona apoiu tomak durante preparasaun,” subliña Ministru Nelyo Isaac.

Governante ne’e informa mós katak, Governu aloka totál orsamentu hamutuk $36.000 (Rihun Tolu nulu resin neen dólares Amerikanu) ne’ebé atribui espesífiku ba atleta sira ne’ebé rekolla medalla no mós ba komité téknika (treinadór sira).

Modalidade desportiva sira ne’ebé simu rekoñesimentu ne’e mak hanesan Taekwondo, Karate, Xadrez, Voleiból Praia, Atletizmu, no Ténis de Kampu.

Partisipa iha serimónia ne’e, Diretór-Jerál Desportu, João M. Rodrigues, treinadór sira, kargu xefia MJDAK, no inan-aman hosi atleta sira ne’ebé haksolok ho prestasaun sira-nia oan nian.

#MídiaMJDAK