DILI, 21 Jullu 2025 – Sekretariadu Ezekutivu Komisaun Nasionál Desportu (CND), servisu hamutuk ho Autoridade Antidopagem de Portugal (ADOP), realiza Fórum Antidopajen ida ba atleta, treinadór no ofisiál sira. Atividade importante ne'e hala'o iha Centro Convenção de Díli (CCD) iha kuadru XII Jogos Desportivos CPLP 2025.

Mensajen Forte husi Prezidente ADOP

Iha ninia diskursu, Prezidente ADOP, Dra. Maria João Melo Cascais, hateten katak desportu iha valór boot de'it bainhira ida-ne'e justu. Nia salienta katak justisa iha desportu hahú ho kompromisu ba étika, lia-loos, no jogu justu (fair play).

"Doping la'ós de'it violasaun ida ba regra sira. Ida-ne'e maka traisaun ida ba konfiansa, negasaun ida ba esforsu, no sombra ida ba talentu," dehan Dra. Maria João Melo Cascais.

Nia dehan ADOP nia misaun mak atu eduka, prevene, no proteje atleta sira ne'ebé moos no proteje futuru desportu nian. Ba foin-sa’e sira, nia hato'o mensajen klaru: "Imi-nia valór la sukat de’it ho medalla, maibé ho aten-barani atu kompete ho onra. Sai embaixadór sira ba desportu ne'ebé moos."

Dra. Cascais agradese povu Timor-Leste ba sira-nia ospitalidade, no ba parseiru CPLP sira hotu ba sira-nia kolaborasaun hodi avansa desportu ida ne’ebé étiku no inkluzivu liu.

Énfaze CND nian ba Koñesimentu

Sekretáriu Ezekutivu CND, Cesarino da Silva, hateten katak Fórum Antidopajen ne'e ho intensaun atu fó koñesimentu ba atleta, treinadór, ofisiál, árbitru, no estudante sira kona-ba problema dopajen.

Nia esplika katak Fórum ne'e fahe ba tematika lima (5), inklui kona-ba estrutura antidopajen nian iha nível nasionál to'o internasionál, no kona-ba lista proibisaun ne'ebé sempre atualiza husi Ajénsia Mundial Antidopajen (WADA).

Konsekuénsia hosi Doping: Perda Medalla: Atleta bele lakon medalla no rezultadu bele nula; Efeitu ba Saúde: Konsumu substánsia bandu sira bele fó efeitu grave ba saúde.

Iha Fórum ne'e, partisipante sira ne’ebé inklui delegasaun husi nasaun CPLP nian, estudante, atleta, no treinadór sira, hetan mós simulasaun matéria atu bele komprende di'ak liután kona-ba lala'ok antidopajen ne'e rasik.

#MídiaMJDAK