DILI, 16 MARSU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, akompaña husi Diretór Jerál Desportu, João M. Rodrigues, hala’o enkontru koordenasaun estratéjiku ho lideransa husi federasaun rua, FNBTL no FBTL, hodi diskute preparasaun ba kompetisaun Liga Nasionál Basketból ne’ebé planeadu sei hala'o iha fulan-Abríl oin mai.

Enkontru ne’ebé hala’o iha Salaun Magna MJDAK ne’e, vizaun prinsipál mak oinsá Ministériu bele fó apoiu ba federasaun sira hodi lidera kompetisaun ne’e ho unidade, hodi kria ambiente kompetisaun ne’ebé saudavel no profisionál. MJDAK reafirma katak Governu sei fó apoiu totál, tantu iha kestaun orsamentu, rekursu umanu, nune'e mós fasilidade desportiva sira.

“Ita-nia objetivu mak unifika forsa. Governu liuhusi MJDAK fó fiar ba federasaun sira hodi organiza liga ne’e, maibé ho supervizaun kadiak (Promenor) husi Ministériu hodi asegura katak rekursu Estadu nian uza ho loloos ba dezenvolvimentu atleta sira,” dehan Diretór Jerál João Rodrigues.

Lideransa husi federasaun rua ne'e aprezenta proposta konjunta ne’ebé prevee partisipasaun husi klube 8 to’o 12 iha territóriu nasionál. Alende organiza kompetisaun, liga ne'e mós sei sai baze prinsipál ba MJDAK hodi hala'o selesaun ba atleta nasionál sira ne’ebé sei reprezenta Timor-Leste iha kampionatu internasionál SEA-Games Malaysia 2027.

Partisipa iha enkontru unifikasaun ne’e, Xefe Gabinete MJDAK, Diretór Nasionál Desportu Federadu, Xefe Departamentu Alta Kompetisaun, hamutuk ho delegasaun husi FNBTL no FBTL, inklui kadrus tékniku sira husi MJDAK.

#MídiaMJDAK