DILI, 14 Jullu 2025 – Diretór Nasionál Dezenvolvimentu Juventude (DNDJ), Firmino Dias Quintas, husi Ministériu Juventude, Desportu, Arte no Kultura (MJDAK), hamutuk ho ekipa téknika, hala'o teste selesaun ba kandidatu hamutuk 52 atu partisipa iha programa interkámbiu juventude iha Japaun. Atividade ne'e hala'o iha Salaun Sentru Juventude Comoro Child Youth Centre (CCYC) Dili.

Tuir Firmino Dias Quintas, programa ne’e ho naran ofisiál "Ship for Southeast Asian and Japanese Youth Program (SSEAYP)", no hanesan inisiativa husi Governu Japaun ne'ebé hahú kedas iha tinan 1974. Nia esplika katak Timor-Leste hahú partisipa iha programa ne'e liuhusi pedidu hosi Sua Exelénsia Primeiru-Ministru Kay Rala Xanana Gusmão.

"Iha tinan kotuk ita-nia joven na'in-tolu mak partisipa, no iha tinan ida ne'e ita rekruta kandidatu na'in-neen, kompostu hosi feto na'in-tolu no mane na'in-tolu," hatete Diretór DNDJ ne'e.

Firmino Dias Quintas hatutan katak partisipante sira ne'ebé selesionadu sei halo viajen iha ró laran durante fulan ida tomak hodi hala'o atividade hanesan, debate kona-ba perspetiva juventude, aprezentasaun kultura husi nasaun ida-idak, no vizita ba instituisaun sira iha nasaun ne'ebé sira vizita.

"Objetivu husi interkámbiu ne'e mak atu fó oportunidade ba ita-nia joven sira atu troka hanoin no esperiénsia ho joven sira seluk iha nasaun ASEAN inklui Japaun. Ho nune'e, sira bele gaña esperiénsia ne'ebé bele fahe fali ba joven sira seluk iha Timor-Leste," nia subliña.

Prosesu rekrutamentu ba programa ne'e loke ba públiku ho rekezitus báziku katak kandidatu sira tenke domina lian Inglés. Husi total kandidatu 52, feto hamutuk 38 no mane 14 mak partisipa iha teste eskrita no sei pasa ba faze tuirmai mak entrevista.

Diretór ne’e mós esplika katak orsamentu ba programa ne'e tomak providénsia husi Governu Japaun. Timor-Leste nia kontribuisaun mak prepara de'it rekursu umanu ne'ebé kualifikadu. Bainhira selesionadu, MJDAK sei fó apoiu ho ekipamentu no souvenir tradisionál hodi fasilita sira-nia aprezentasaun kultura durante atividade.

#MédiaMjdak