COVALIMA, 9 Outubru 2025 – Sua Exelénsia Ministru Administrasaun Estatál (MAE), Tomás do Rosário Cabral, lidera serimónia abertura ba Festival Fronteira Kulturál 2025 iha Salaun Ambo-One, Kamanasa, Suai, Covalima. Festival ne’e lori tema jerál: Interkámbiu Kultura ba Hametin Rekonsiliasaun, "Memória Koletiva – Husi Memória Ba Esperansa".

Atividade ne’e, ne’ebé organiza hosi Ministériu Juventude, Desportu, Arte no Kultura (MJDAK) liuhosi Sekretáriu Estadu Arte no Kultura (SEAK), Centru Nasionál Chega! (CNC), no PAM Covalima, hahú ho diálogu ho Lia Na’in sira ho tema "Hametin Rekonsiliasaun liu husi Lala'ok Kultura".

MAE: Kultura Sai Xave ba Konfiansa ASEAN nian

Ministru MAE, Tomás do Rosário Cabral, iha ninia diskursu, salienta katak festival kulturál ne’e importante tebes atu partisipa masimu hodi bele manán konfiansa bainhira Timor-Leste besik atu sai membru permanente ASEAN nian.

Nia agradese tebes ba delegasaun hosi Timor Osidentál (NTT) ne’ebé iha komitmentu boot hodi partisipa.

"Ita sidadaun mak ketak, maibé ran ida de’it, husu ko’a iha Timor no ran husi Timor rasik. Tanba ita Timor moris ho kultura, ho lian ida de'it, katak nasaun maka iha fronteira maibé komunidade laiha fronteira," dehan Ministru MAE.

Nia husu ba Autoridade Munisipál no Autoridade Postu Administrativu sira hotu atu hola parte hodi halo eventu ne'e susesu. Lia Na’in sira ne’ebé partisipa mai kompletu husi Munisípiu 12 no RAEOA.

NTT: Ita Maun-Alin Dame Ne’e Furak

Xefe Delegasaun hosi NTT-Kupang, Felisberto Amaral, espresa ninia haksolok no hatete Festival Fronteira Kulturál ne’e ba dala tolu ona no kontinua hametin lasu amizade.

Delegasaun NTT-Kupang ne’e hamutuk ema na’in 46 (46) no lori lema: "Ita Maun-Alin Dame ne’e Furak".

"Diálogu hanesan ne'e atu nune'e ita bele fahe esperiénsia ba malu, atu nune’e ita bele amizade nafatin iha liña Fronteira no labele hamosu konflitu ba malu, tanba ita ne’e Maun ho Alin ka tuir Kultura katak feto-sa'an no uma-mane," dehan Felisberto Amaral.

Nia rekomenda ba Governu rua atu kontinua diálogu kulturál hanesan ne’e hodi kria amizade ne’ebé metin ba nafatin iha liña Fronteira, hodi rai konflitu pasadu nu'udar istória no haree ba futuru dezenvolvimentu nasionál.

Diálogu ne’e partisipa hosi Vise Ministru MOP, SEATOU, SEDL, Prezidente Autoridade Munisípiu sira, delegasaun NTT Kupang, no Sosiedade Sivil sira.

#MídiaMJDAK