DILI, 2 Outubru 2025 – Ministériu Juventude, Desportu, Arte no Kultura (MJDAK), liuhosi Sua Exelénsia Ministru Nelyo Isaac Sarmento, simu Prezidente Rádio e Televizaun Timor-Leste, E.P. (RTTL, E.P.), Elizau Isaac Veloso, hamutuk ho ekipa, hodi aprezenta planu importante ida atu hamoris fali programa Crescendo. Reuniaun ne’e hala’o iha Salaun Magna MJDAK, Lecidere.

Inisiativa RTTL, E.P. hodi Servisu Hamutuk

Iha reuniaun ne'e, ekipa RTTL, E.P. mai ho inisiativa hodi husu kooperasaun no apoiu hosi Ministériu atu programa ne’e bele hala’o ho susesu. Kooperasaun ne'e hetan konkordánsia hosi Ministru Nelyo Isaac Sarmento.

Programa Crescendo sei halo lansamentu iha loron 25 Outubru 2025 no nu'udar formatu divertimentu ida ne’ebé kombina hamutuk arte, múzika, kuiz (quiz), no mós eventu Night Market (Merkadu Kalan).

Objetivu Xave no Tagline Nasionál

Ministru Nelyo Isaac Sarmento no Prezidente RTTL, E.P. konkorda katak objetivu prinsípál husi programa Crescendo mak atu:

1.    Promove Kriadór no Artista Lokál: Fó fatin no plataforma ba obra múzika husi artista Timor-oan sira hodi espresa sira-nia talentu no kreatividade.

2.    Apoia Produtu Lokál: Fó biban ba negosiante sira atu bele promove no fa’an sira-nia produtu lokál.

3.    Divertimentu Sosiál: Sai hanesan fatin atu ema bele passa tempu iha fin de semana ho divertimentu ne'ebé saudavel.ana ho divertimentu ne'ebé saudavel.

Programa Crescendo sei lori orgullu nasionál hodi uza tagline:

"Ha'u Timor Oan, Orgullu ho Timor-Leste!"

Kooperasaun ne'e marka sinerjia importante entre MJDAK ho RTTL, E.P. hodi dezenvolve Juventude, Desportu, Arte no Kultura liuhosi meiu komunikasaun sosiál ne'ebé naton.

#MídiaMJDAK