Dili, 02 Jullu 2026 – Diretór Nasionál Patrimóniu Lojístika no Infraestrutura husi Ministériu Juventude, Desportu, Arte no Kultura (MJDAK), Abel de Jesus Andrade, hamutuk ho xefi departamentu rua no sub-inspetora unidade inspeisaun no auditoria, hala'o serimónia despedida ba estudante estajiária Marcia Alexandra da Cruz Pereira ne'ebé remata nia estájiu profisionál durante fulan haat iha Departamentu Jestaun Teknolojia no Patrimóniu. Marcia nu'udar estudante husi Universitas Teknologi Digital Indonesia (UTDI), ida husi universidade privada iha D.I. Yogyakarta. Atividade ne'e hala'o iha Salaun Ema ho Defisiénsia, MJDAK, Lecidere, Dili.

Tuir Diretór Nasionál Patrimóniu Lojístika no Infraestrutura, Abel de Jesus Andrade, hatete ministériu agradese tebes ba estajiáriu sira bele mai aprende hamutuk no husu atu hatudu atitude disiplina no respeitu mak nu'udar valor liu hodi hatudu ema ida nia matenek. Nia konsidera katak estajiária Marcia durante fulan haat hatudu disiplina, respeitu, no pontualidade iha servisu fatin.

"Agradese tebes ba alin estudante bele mai aprende hamutuk ho ami iha MJDAK. Ha'u nia mensajen mak ne'e: ita bele matenek, maibé tenke hatudu ita nia atitude respeitu no disiplina. Ida ne'e mak valor liu, tanba iha empreza ka kompañia sira presiza liu ema ne'ebé atitude di'ak no disiplina. Durante ne'e, alin estajiáriu hatudu duni nia pontualidade no kuriozu atu aprende – ida ne'e mak tenke kaer metin," dehan Abel de Jesus.

Diretór Nasionál ne'e mós lori MJDAK nia naran hato'o deseju di'ak ba susesu ba estudante estajiária nia estudu. Nia husu katak wainhira remata, bele fila fali mai Timor-Leste hodi implementa matenek ne'ebé iha atu kontribui ba nasaun. Nia mós enkoraja atu nafatin buka aprende tanba ministériu nia odamatan nakloke ba universidade sira liu husi kooperasaun bilateral ho nasaun vizinhu Indonézia iha setór edukasaun, liu-liu ba joven sira tama iha nasaun ASEAN.

Partisipa iha serimónia ne'e mak José António Borges Guterres, Xefi Departamentu Jestaun Teknolojia no Patrimóniu; Martino Araújo da Costa, Xefi Departamentu Administrasaun no Jestaun Pessoal; no Marlía Celina Amaral de Fátima, Sub-Inspetora Unidade Inspeisaun no Auditoria.