COVALIMA, 29 Setembru 2026, GKI—Ministeriu Juventude Desportu Arte no Kultura (MJDAK), investe tan konstrusaun kampu desportu multifunsaun iha Aldeia Fatisin ,Suku Kamanasa,   Munisipiu Covalima. Obra ne’e, Kompania JAFREQ LEO RAI Unipesoal LdA mak kaer ho durasaun tempu fulan Neen (6).

Tanba ne’e, Reprezentante MJDAK, Diretur Jeral Juventude, Mario Tilman ho ekipa tekniku no  aprovizionamentu, Tersa (29/09), aprezenta-an ho entrega dokumentus legais (termu kontratu) ba kompania manan nain no Prezidenti Autoridade Munisipiu Covalima, Miguel Armada Cardoso.

Aprosimasaun no fo kunesementu ba PAM ne’e, halao iha eskritoriu PAM Covalima.   

Diretur Jeral Juventude (DJJ), Mario Tilaman hatete, objetivu husi prezensa iha Covalima atu fo kuñesimentu ba iha PAM relasiona ho obra ba kampu multifunsaun ne’ebé mak governu atraves husi MJDAK.  PAM Covalima nudar  na’in ba iha Munisipiu ida ne’e oinsá utiliza, kontrolu, bele tau matan ba iha obra ida ne’e.

“MJDAK hakarak atu konstrui iha Munisipiu Covalima maske investimentu mai husi ministériu maibé tanba PAM mak hanesan na’in ba iha Munisipiu ida ne’e oinsá utiliza, kontrolu, bele tau matan ba iha obra ida ne’e ne’ebé sei konstrui iha Suku Camnasa nia area no hetan ona atribuisaun na’in ba rai husi Teras no Propriedades atu bele harii kampu ho ida ne’e mak ita sei entrega termu kontratu ba iha kompañia manan na’in atu bele hahú obra refere tuir termu kontratu,”  Mario Tilman esplika.

Mario hatutan,  Governu Sentral liu husi ministériu tau planu hakarak konstrui tan Estadiu no Jinajiu iha Munisipiu Covalima wainhira estatutu rai refere hetan ona atribuisaun husi Teras no Propriedades hodi entrega ba ministériu atu halo investimentu desportivas.

Tanba ne’e, Mario  husu parte autoridade oinsá mak halo aproximasaun ho komunidade hamutuk APA, Xefí Suku no Xefí Aldeia sira hodi buka solusaun atu fo biban ba iha governu sentral bele halo no dezenvolve infraestruturas desportu iha Timor-Leste liu-liu prepara kondisaun atu simu desentralizasaun poder lokál tanba infraestrutura sira ne’e komunidade no autoridade sira mak sei utiliza.

Enkuantu  PAM Covalima, Miguel Armada Cardoso   konkorda tebes ho konstrusaun obra ba kampu multifunsaun ne’e se wainhira estatutu rai ne’e hetan ona atribuisaun husi parte Teras no Propriedades prontu atu kopera no asegura obra refere atu nia prosesu konstrusaun la’o ho susesu. Liga ho problema rai ba konstrusaun Estadiu no Jinajiu parte autoridade tenta buka solusaun  atu bele kontribui netik ba iha prosesu dezenvolvimentu iha Timor-Leste liu-liu Covalima.

Ekipa MJDAK mós hafoin halo aproxima ho PAM kontinua halo mós aproximasaun ho APA Covalima Postu Suai Vila akompaña ho Xefí Suku no Xefí Aldeia iha Suku Kamanasa hamutuk ho komapñia manan na’in inklui tékniku husi kompañia hodi entrega dokumentus termu kontratu au mezmu tempu tun direta ba iha terenu hodi halo observasaun direta ba fatin no rai ne’ebé planu atu kontrui obra kampu multifunsaun iha Suku Kamanasa Aldeia Fatisin Munisipiu Covalima ne’ebé sei konstrui husi kompañia JAFREQ LEO RAI Unipesoal LdA ho durasaun tempu fulan Neen (6).  #MédiaMjdak#