DILI, 1 Agostu 2025 – Ministériu Juventude, Desportu, Arte no Kultura (MJDAK) hato'o parabéns boot ba boxista Timoroan, Deniel de Assis Belo, ne'ebé sai ona kampion iha eventu desportivu internasionál Revolta Kombat Chapter 1 Boxing.

Reprezentante husi El-Matador Boxing Club, Deniel konsege hatudu performa di'ak no manán ninia adversáriu, Krispinus Holo husi Indonézia, hodi lori sintu kampion nian mai Timor-Leste.

Vitoria ida-ne'e marka susesu boot ida ba desportu boxe nian iha Timor-Leste, hodi hatudu katak atleta Timoroan iha poténsia boot atu kompete iha nível internasionál.

Dedikasaun ba Nasaun no Família

Hafoin manán, Deniel de Assis Belo hato'o ninia lia-menon ho emosaun:

"Vitoria ida-ne'e ha'u oferese ba rai doben Timor-Leste, liuliu ba ha'u-nia família tomak. Ha'u-nia dedikasaun ne'e ba ha'u-nia nasaun no sira hotu ne'ebé apoia ha'u."

Nia mós agradese ba ninia treinadór, Sr. Abílio Orlando, no ba CEO Revolta Kombat, Sr. Xander Serano, ne'ebé fó oportunidade ba joven sira atu hatudu sira-nia talentu iha ring laran.

MJDAK apela ba públiku no setór privadu atu hamutuk suporta liután ita-nia boxista sira atu bele hetan futuru ne'ebé nabilan liután iha mundu desportu internasionál.

#MídiaMJDAK