DILI, 9 Outubru 2025 – Diretór Jerál Juventude (DJJ) husi Ministériu Juventude, Desportu, Arte no Kultura (MJDAK), Sr. David Tomas de Deus, akompaña husi Xefe Planeamentu, Avaliasaun no Monitorizasaun UNICEF nian, Sr. Siuman Ray, ensera ofisiálmente Treinamentu Training of Trainer (TOT). Treinamentu ne'e hala'o ba treinadór na'in-12 husi MJDAK no UNICEF, durante loron tolu (3) iha Salaun S. João Paulo II Comoro, Dili.

Objetivu prinsipaál husi TOT ne'e mak atu kapasita fasilitadór sira atu bele kontinua hanorin no sensibiliza informasaun kona-ba Orsamentu Jerál Estadu (OJE) ba organizasaun no sentru juventude sira.

Kompromisu Kooperasaun ba Dezenvolvimentu Juventude

Diretór Jerál Juventude, Sr. David Tomas de Deus, hato'o ninia agradesimentu ba parseiru boot UNICEF:

"Durante loron tolu, ita aprende hamutuk liga ho Orsamentu Jerál Estadu. Ha'u agradese ba UNICEF tanba iha kompromisu boot atu ajuda programa dezenvolvimentu juventude no adolesente iha Timor-Leste, parseria ho MJDAK," DJJ hateten.

Nia husu ba partisipante TOT sira atu uza kuñesimentu ne'ebé sira hetan ona hodi transmite fali ho efikásia ba sira-nia kolega sira seluk.

Sensibilizasaun OJE nu'udar Alvu Prioritáriu

Diretór Nasionál Assosiativismo Juventude (DNAJ), Sr. Mário Tilman, esplika klaru kona-ba objetivu husi treinamentu ne'e:

"Objetivu husi formasaun ne'e mak oinsá ita atu sensibiliza Orsamentu Jerál Estadu (OJE) para sira mós bele intende prosesu elaborasaun sira ne'e, tanba orsamentu ne'e rasik sei benefisia mós ba sira," DNAJ Mário Tilman subliña.

Nia hatutan katak partisipasaun juventude nian importante tebes iha prosesu elaborasaun orsamentu, nune'e sira presiza hatene ninia prosesu, atu asegura OJE ne'e iha benefísiu ne'ebé klaru ba joven sira.

Alvu Joven Na'in 19 no Sentru Juventude 12

TOT ne'e hanesan pasu inisiál. Tuir planu, fasilitadór na'in-12 ne'ebé hetan formasaun ona sei kontinua fahe sira-nia kuñesimentu ba organizasaun juventude sanulu resin-sia (19). Ida-ne'e inklui Sentru Juventude sira iha Munisípiu 12 no Rejiaun Autonómu Oé-Cusse Ambeno (RAEOA), hamutuk ho organizasaun xave ne'en (6) iha Dili, hanesan ADTL, ANZJHN, ANCTL, APFTL, UNETL ho CNJTL.

Organizasaun ida-idak reprezenta husi Diretór Ezekutivu no Ofisiál Finansas, hodi garante informasaun ne'e to'o duni ba ema ne'ebé loos.

#MídiaMJDAK